數碼相機價格愈賣愈低，但由於相片質素欠佳，唔少人都懷疑用手機影相嘅價值，不過原來大家最受嘅係可以即影即Send！結果愈嚟愈多人加入「手機快相黨」嘅行列。你咪話無聊，佢哋奇招多多，SnapShot四格漫畫、超市偷拍報價、PhotoHunt互動教室、老公行蹤Photo特搜！絕對令手機影相功能嘅價值大大提升。
記者：朱崇德 攝影：林栢鈞、楊錦文、朱崇德
Model：Ken、Saloui、Grace、Danny、Alice、Reggie（Space2）
「早排買咗部有影相功能嘅手機，就開始影唔停，最過癮當然係可以即影即Send，見到得意嘢就即時影低Send畀男友分享！呢排潮流興快閃黨，阿Ken就封我做快相黨。」Saloui講得好興奮。
講到呢度，阿Ken卻苦口苦面，「佢每日平均都Send成幾幅相畀我㗎！每月張單返嚟都好金！不過有時突然收到佢一張Kiss你嘅相，都幾Warm㗎！同用SMS齋文字比，梗係不可同日而語啦！」
Ken同Saloui呢對情侶，閒來都會做吓Model仔，全因為鍾意影相。Saloui話自己都有部數碼相機，不過影相技巧麻麻，所以一直都係鍾意俾人影多過自己落手落腳影，不過自從「影相手機」一出，情況就有180度改變！
Saloui話淨係Send自己嘅相太單調，要搞搞花臣先有情趣，不妨睇睇佢嘅好橋。「我最鍾意同佢玩手機迷蹤，玩法好簡單，影張附近環境相，等佢估吓我喺邊度，如果想Date我，就先憑張相搵我出嚟啦！」Saloui就試過要阿Ken估初次約會餐廳、游過水嘅沙灘等有紀念價值嘅地方。
有幾掂
對於剛拍拖嘅情侶，的確增加唔少生活情趣！
不過論經典中嘅經典，都係阿Ken嘅SnapShot四格漫畫！「嗰次行銅鑼灣，Saloui話我眼金金望住個着TubeTop嘅女仔，唔睬我之餘重即刻走，我等咗成粒鐘，佢連迷蹤相都唔Send張嚟，我估佢都一定唔接我電話。嗰刻我忽發奇想，連Send四張相玩4格漫畫，又送禮物又講對唔住，咁竟然就𠱁番佢。」嘩，好橋！各位喺咁嘅危急關頭不妨照抄！
有幾掂
SnapShot四格呢招，喺對方唔接你電話時幾有用，不過可一不可再，成日咁Send太貴！
有人預視過手機踏入3G後，變得有聲有畫，人嘅私隱可能會因而受到監視。不過事實上，現在的2.5G，都可能叫大家提高警惕，特別係想作反嗰陣。以下是Jimmy及Shanon兩夫妻的真實個案……
有幾掂
呢條橋簡直趕絕男人，不過更絕係送部可以拍短片嘅手機畀老公，好似Nokia6220同LGG8000咁，想出蠱惑？NoWay！
Jimmy同Shanon兩人結婚3年，老婆一早知到Jimmy依然鍾意周圍蒲。忽然有日放工返屋企，Shanon竟然冇鬧佢，重失驚無神送部佢想買好耐嘅Nokia7250影相手機畀佢，Jimmy開心到彈起！送機後第二日，真相現形！放工後的HappyHour，竟突然出現老婆Send嚟嘅短訊，要Jimmy即時影張相Send畀佢，即係變相突擊檢查。
Jimmy都唔笨，見招拆招，一於影定唔少健康正義相，隨時應付老婆，掩飾行蹤，點知一樣斷正！
玩手機SnapShot唔好以為係IT人嘅專利，其實影相手機呢股潮流，都開始入侵師奶一族。好似靚師奶Grace，早在數月前，就加入SnapShot潮人行列。好多人買影相手機都係貪玩貪新鮮，但估唔到師奶更加醒，玩影相之餘更加重實際，Grace就話，全靠影相手機，年中可以慳唔少。首先，「用手機格價，一流！」
據Grace講，好多人見超市上標住「特價貨」，就以為一定平係咁買！其實有啲成個月冇買嘅貨品，基本價格已經標咗上去，所以就算買特價貨，都一樣買貴咗！「做得師奶，識格價先至得，唔係點持家，不過我記性唔多好，唔通攞支筆出嚟抄咩，肯定俾人趕，手快快影低佢，咁格多多都冇問題啦，慳唔少㗎！」Grace話重可以同其他快相師奶黨交換平價情報，快手執平貨都靠晒手機！
有幾掂
據法律界人士講，手機影相格檟，唔會有版權等法律責任，但超市屬私人地方，所以有可能俾人趕！
Grace話，用得部手機影相功能最盡嘅，都算係佢家中10歲嘅仔仔，「佢第一樣鬼主意，就係唔再用喺雪櫃門貼Label嘅方法叫我買零食，佢話我成日買錯，所以就索性影低個盒面，叫我跟住買，都唔知幾人細鬼大！」
有幾掂
遙控購物概念，其實可以用於其他物品之上，例如生日禮物、幫人買衫……有辦你睇，有如網上購物
玩手機影相，都唔係一定要部手機有鏡頭先玩到嘅！好似Nokia新出嘅Pt-3外置式相機，隨影隨Plug，就可以將數碼相片傳入對應手機內，做Wallpaper、玩SnapShot好方便。好似Alice一家都用Nokia手機，$650買部番嚟，成家都有影相手機玩！
Alice話自從老公買咗Pt-3返嚟，每個星期嘅家庭日變化好大，「我會順手影啲花卉、動物等事物，得閒同仔仔Reggie攞番出嚟溫故知新，考吓佢記唔記得，簡直係活動教學版NationalGeographicChannel。」
有幾掂
戶外活動教學，再加彩色影像教材，而且家庭日玩影相，可以加強埋親子關係。
「我個玩法同媽媽嘅有啲類似，好多時我行街見到一啲特別事物，我都會影低佢，得閒就畀佢睇，要佢串番個英文名畀我，又或者藉住啲相，同佢講解吓出面有乜新事物，咁樣會更加有趣味性，小朋友學嘢都快啲。」
有幾掂
咁記生字都幾有趣，而且由細畀仔仔多啲接觸日常簡單科技，都可增進小朋友的科技常識。
除咗影相手機之外，呢個Function連一般數碼相機用戶都玩到，就係將拍下嘅數碼相片放入「Photoshops」或「小畫家」一類繪圖軟件，然後再在旁邊寫日記，仔仔Reggie話玩得非常開心，而且又可以畀小朋友自細養成寫日記嘅習慣，有助加強他們的寫作能力。
有幾掂
由手機過相入電腦，主要有兩種方法，一為紅外線傳相，Notebook用家最啱；其二是用E-mail傳相，只要申請有該項服務即可，尚算簡單。
