昨日講起USC（南加州大學）嘅校友猛人，就醒起威水校友對大學嘅功用。上星期K教授請食飯，同枱重有F教授、W先生。W先生系出名門大族，識得唔少猛人；佢哋幾位年紀比左丁山大，所以左丁山聽古仔多過講嘢。
W先生話：「美國大學最留意畢業生動向，只要你成咗名，發咗達，你去咗邊佢哋都會搵番你，聯繫感情，跟住叫你捐錢或者幫助學校發展，提拔新畢業生。香港啲大學就好似比較忽略呢方面。」F教授負責監督大學嘅校友工作，聞言猛咁點頭。話以後要重組校友網絡。
W先生話：「德昌電機，係工業藍籌股，係人都識。PatrickWang（汪穗中）畢業於普渡大學Prudue，學校以工程科著名，現在普渡捉住汪穗中合作，德昌有乜人才需要、產品研究，都向普渡大學尋求，正式係互惠互利。另一位校友係包陪慶（蘇海文夫人），大概捐過唔少錢或者幫過母校唔少，普渡畀咗一個榮譽博士學位佢，皆大歡喜。重有，陳永祺亦畢業於普渡，睇怕遲早學校都會搵佢幫手㗎！」
美國大學經常講：母校以校友為傲，校友以母校為榮。校友有所成，母校聲譽提升；母校研究成績好，校友臉上貼金。至於母校如何創造科研，提高聲譽，可說無財不行，有乜辦法唔要求校友捐錢！哈佛富甲天下，仍不斷向校友及商界募捐，就係極度明白錢財重要嘅道理。