颱風「杜鵑」來勢洶洶，短短18個鐘頭，就由1號風球扯到上8號，金融市場噚日下晝全面停市。由於颱風逼近，港股大部份時間窄幅上落，但零售股就全線急升，恒指半日市升36點，成交70億元。
自由行概念煞食，市場資金去晒捧零售股，噚日15大上升股中，就有10隻係零售股，升幅重係好驚人。
好似排頭位嘅GAYGIANO（686），大升147%；第2位的景福（280）都升52%；至於第15位的利信達（738），亦有26%進帳。
今個大升浪，工業股率先彈出，跟住同國企輪流炒，到佢哋要唞氣，市場擔心緊冇一類股份可以接力而上之時，中國就推出自由行，大力刺激香港經濟，帶動旅遊股，特別係零售股由低位強力反彈。香港備受非典打擊，消費市道低迷，有誰估得到，零售股竟然受惠自由行，成為新一代的明星。
中國有十多億人，自由行概念起碼可以用上10年8載，問題不在於內地放多少人來港，而係香港能夠應付得幾多？自由行「供應」源源不絕，旅遊同零售業受惠屬長期性，呢一輪零售股升得太急，調整隨時會出現，但中長線仍可看好，今後每一次調整，都係低吸機會，情況和國企一樣。
六福（590）同恒豐金業（870）都有配合自由行而定出擴展零售網絡的計劃，六福噚日收1.66元，升5.7%，恒豐金收1.7元，升11%，呢兩隻股份由7月中的低位起步，剛好升了1倍。
恒豐金趁市旺集資發展，配售7247萬新股，集資9200萬元，其中4600萬元擴展零售網絡。
恒豐的金至尊陳列室已成為內地客來港遊之必然景點，聽聞每日有數千人參觀和購物，恒豐已開始將陳列室擴大，以應付更多人流。恒豐除本銷外，出口亦係主力，早前皇馬前鋒朗拿度高調參觀金至尊展覽館，對恒豐將產品推廣至世界市場，大有幫助。
至於六福，佐敦新店已加緊工程，趕在十．一黃金周前開業，佐敦人流旺，預計新店可成為另一個盈利增長點。
郭兆誠