美股周一假期休市，加上颱風「杜鵑」襲港，唔少芬佬都持觀望態度，有啲甚至唔返工。不過「杜鵑」未能吹走散戶對自由行概念股嘅如火熱情，零售股全面勁升，其中GAYGIANO（686）借勢勁升147.83%，收報0.285元；景福（280）及鱷魚恤（122）亦分別升52.8%及48%。中旅（308）及恒豐金（870）亦受追捧，分別升4.43%及11.1%，成交達9924萬元及1.95億元，成交重勁過藍籌恒生（011）。港股下午休市，半日收市報10939，升36點，喺芬佬半停手之際，半日成交都有成70.8億元，反映游資動力未減，抵隻港交所（388）升2.1%。
富豪酒店（078）本來都極具自由行概念，不過晨早就停牌，無得趁高興。公司通告話要等待公布股價敏感消息，市場就有傳聞話富豪正在放售的富豪東方酒店及沙田麗豪酒店，其中富豪東方獲投資者以3.6-3.7億元洽購，並且快將落實咁講。不過，最近自由行炒風尚未到達高潮，酒店價格只是開始反彈，而富豪等賣資產都已經等咗好耐，都唔爭在等多一陣睇清楚個形勢，至善價而沽都未遲啦。同系嘅世紀城市（355）及百利保（617）噚日都停牌。
至於國企股，黑客話資金似乎已覺得國企股升勢已盡，想換馬追捧紅籌股，所以要留意吓聯想（992），TCL（1070）、粵投（270）與越秀投資（123）等股份。國企指數噚日跌31點，報3335.63點。
阿虎