漢堡前鋒高原直泰喺前晚對德累斯頓戴拿模場德國盃嘅入球，可能係佢職業生涯最重要嘅一球，點解？事關佢幫球隊解咗咒之餘，亦令佢自己喺隊中嘅位置變得更加鞏固。
近屆捧親德國聯賽盃嘅球隊，季初一定打得好差，如上屆冠軍哈化頭五場聯賽就得六分。漢堡喺前月捧走呢個盃後，恍如被詛咒一樣，喺頭四場聯賽得嗰一分，其中作客禾夫斯堡更慘敗一比五。𠵱家佢哋喺前晚場德國盃首圈，憑高原喺八十一分鐘嘅入球贏德累斯頓一比○，晉級之餘亦攞番啲信心，而德甲聯喺下周六開番，到時佢哋嘅表現應該會好番啲。
另外，高原今屆德甲漸受重用，而佢亦不負所託，四場入一球，𠵱家佢更成為球隊嘅救世主，睇嚟喺往後日子坐硬正選位。
唔知球迷重記唔記得韋華斯呢？之唔係喺前球會阿仙奴同𠵱家球會國際米蘭都要坐冷板居多嘅阿根廷球員囉。話時話，呢位三十三歲後衞喺球會雖唔受重用，但喺國家隊就好得教練比爾沙嘅歡心，重入選嚟緊對智利同委內瑞拉兩場世界盃外圍賽。臨老標番個尾會，算係咁啦！
啱啱由馬瑟韋爾過檔愛華頓嘅麥法頓，雖然自己搵到個好歸宿，但佢都冇忘記之前同佢合作嘅十九個隊友。事緣馬瑟韋爾球員有近年半出唔足糧，所以佢叫馬瑟韋爾利用賣佢賺得嘅一百二十五萬鎊（約一千五百二十萬港元），作為前隊友嘅薪金。佢咁有情有義，抵佢發達。
羅馬因冇錢找數，買唔到阿積士嘅捷古，但阿積士都算係咁，同意將捷古借畀羅馬四個月，重話如果羅馬到時攞到一千八百萬歐元（約一億五千萬港元）出嚟，生意重有得做。但有云「啲錢唔會喺天跌落嚟」，羅馬冇得踢歐冠盃，去邊度搵咁多錢呀，阿積士睇嚟要另覓買家。
巴塞隆拿教練列卡特證實，新加盟嘅土耳其門將魯斯度因唔識講英文或西班牙文，同後防球員溝通唔到，頭一個月冇得打。我求大俠都贊成列卡特嘅做法，門將同後衞如果喺言語上溝通唔到，就會出現好多誤會。魯斯度想成為巴塞嘅頭號龍門，惟有讀好啲英文或西班牙啦！