久未露面的薛芷倫，一直有傳婚姻出現問題，她前晚以性感打扮出席水晶宣傳活動時，終於承認已經與丈夫馬清偉分居，但薛芷倫稱馬清偉永遠是她一世的知己好友，又歡迎傳媒以「薛小姐」來稱呼她。
薛芷倫、郭富城及鄭兆良等，前晚到中環Dragon-i出席由Lalique水晶所舉辦的活動，當中以久未亮相、盛傳已和大生銀行董事局成員馬清偉離婚的薛芷倫最受注目，前晚她穿上Gucci黑色低胸上衣，狀態甚佳，她表示現在生活的焦點都放在幾名子女身上，亦有意攻讀心理學。其實薛芷倫與馬清偉離婚一事早已傳遍社交圈，但兩位當事人均未就事件作出回應，前晚薛芷倫終於承認與馬清偉已分開了一段時間，問她現在是否正展開她的新生活？薛芷倫說：「𠵱家好難界定係咪新階段定新生活，喺香港有好多責任，要過新生活就要搬去外國。」
同馬生係一世嘅好朋友
那麼現在應稱薛芷倫為「馬太」還是「薛小姐」？她說：「姓氏唔係一種暗示，你哋叫我做馬太或者薛小姐我都歡迎，因為我啲仔女的確姓馬㗎嘛。」其後她說：「之前有好多誤解式嘅報道我都冇行出嚟澄清，我𠵱家可以講，我同馬生嘅關係永遠係一世嘅好朋友同知己，我哋係分開咗一段時間，因為大家都想有個人嘅空間，我哋喺思想行為有啲分歧，所以要搵返自己嘅空間，如果將來天時、地利、人和夾嘅話，喺番埋一齊，又或者行自己嘅路都唔定。」
對於是否已經與馬清偉簽妥離婚協議書，薛芷倫說：「有冇簽字冇需要交代，法律上嘅嘢好複雜，名份上嘅嘢亦唔需要向公眾交代，我只可以講法律上我哋係分居，已經分開咗一段時間，細節就唔需要交代，呢個方法係大家嘅意願，幾個小朋友係永遠屬於我哋嘅。」薛芷倫此言是否留一條後路，暗示有可能再與馬清偉一起？她說：「又唔係，你哋傳媒嘅報道成日都有界限，唔係分居就係離婚，我同馬生嘅關係永遠係有聯繫嘅，到呢個人生點，都想畀大家互相有個空間。」問她現在是否處於冷靜期？薛芷倫說：「𠵱家係適應期，可長亦可短。」
一個人搵番自己嘅方向
那麼薛芷倫是否仍然深愛馬清偉？她說：「呢個問題好深奧，人同人之間係千絲萬縷嘅，好難用說話去交代，呢種感覺應該保留畀我同馬生嘅私人空間。」對於是否只要她願意便可與馬清偉再在一起，薛芷倫說：「唔係咁簡單嘅，總之我哋有保持聯絡，關係仍然好好，最緊要係個心仍然一齊，因為我哋始終係小朋友嘅父母。」
至於現在有沒有追求者，薛芷倫則說：「我細個結婚同對愛情嘅感覺，同𠵱家已經唔同咗，暫時希望一個人先，搵番自己嘅方向。」問她現在的經濟狀況如何，薛芷倫說：「多有多使，少有少使啫，況且我淡出ball場後已經唔需要花咁多錢打扮，亦冇話因此蒲多定蒲少咗，根本以前都係有朋友生日，咁啱畀你哋影到啫。」
採訪:顏英儀 攝影:陳志嵐
