住宅樓市已經由一手樓主導，但𠵱家發展商嘅新盤長賣長有，每個盤究竟賣咗幾多，外人真係好難知，即使土地註冊處有登記，都冇人會咁神心去查證。
中原地產執行董事張奕威對蘭西講，中原內聯網新增咗個「一手王」，每個樓盤都有一張空白嘅價目表，每逢有新盤單位送交登記，都會「對號入座」，填咗其中一個空格，咁數吓就可以知到發展商某一個盤賣成點。
而中記重會將自己做，或者係市場嘅成交加埋入去，令「一手王」資訊更update，待有土地註冊處登記時就加以取代。咁外區同事一㩒機就知有邊個單位剩，可以全力游說客戶，唔使浪費時間同精力。𠵱家已經有300幾個盤嘅價單。
颱風杜鵑來勢洶洶，全港市民都忙住為居所做好防風措施，屯門區地膽代理祥益地產，一早展開「關心行動」，為區內所有交低鎖匙嘅業主盤檢查單位窗戶，特別係近海邊嘅屋苑。
祥益地產營業董事謝澤銘同蘭西講，今次颱風嚟得好快，而且特別猛烈，所以佢哋提早喺十點開始，幫啲鎖匙盤單位進行關窗戶行動，至於一啲近海邊嘅屋苑，例如邁亞美海灣同慧豐園，會睇埋單位有冇滲水㖭，重喺掛八號風球前搞掂晒。
謝澤銘又話，因為好多單位嘅業主，未必可以即時返到屋企，所以每次打風，佢哋都會有相關行動。
自從放寬自由行之後，旺區商場周不時都人頭湧湧，旺角始創中心嘅大業主九龍建業話，八月份商場人流比七月多咗三成。一向反應敏捷嘅發展商一聽到呢個消息，即刻就話要加租，始創中心其中一個租戶，近排續租嘅時候已經加咗五個巴仙，九建重話，嚟緊續租嘅租戶，都會加百分之五至十嘅租金。
另一旺區銅鑼灣都係內地旅客嘅熱門蒲點，商場人流量大，華人置業凌緣庭話，銅鑼灣嘅商場好似崇光百貨及東角駅，八月商場人流都多咗兩成，所以都計劃加租百分之五至十。
颱風杜鵑襲港，八號風球高掛，搞到噚日下晝嘅記者會都要迴避。
太古鰂魚涌逸樺園原本安排四點鐘開記者會，諗住唔使同其他行家撞時間，傳媒又可以有人手出席，誰知下晝兩點幾就掛八號風球，幾個上晝開嘅記者會可以如期舉行，長實嘅宇晴軒話明風雨不改，惟獨太古要改期嘞。
而嘉里發展原本今日喺深圳搞記招，開放雅頌居嘅新示範單位，可能擔心颱風過後，現場環境一片混亂，所以索性延期至下個禮拜二。
蘭西
電郵地址：
