查理斯帶卡米拉捧場
姬妮芙再寫深情籌200萬

荷李活靚女姬妮芙柏露（GwynethPaltrow）近年喺影壇鮮有佳作，每次提到佢嘅新聞，差不多都同樂隊Coldplay主音男友ChrisMartin嘅戀情有關，不過姬妮芙話晒都憑描寫莎士比亞情史嘅《寫我深情》做過奧斯卡影后，點都對莎劇有感情。

扮羅密歐與茱麗葉
前日姬妮芙就同《寫我深情》嘅男主角約瑟費恩斯（JosephFiennes）喺倫敦SouthBank嘅GlobeTheatre「復合」，佢哋再次一齊合演慈善舞台劇籌款，不過今次就扮演羅密歐同茱麗葉，姬妮芙雖然有成五年冇同約瑟合作，但佢哋喺綵排時，都表現得好投契。
其實呢個舞台劇係為查理斯王子嘅慈善基金籌款，當日查理斯重帶埋女友卡米拉捧場，大會安排佢哋喺一個最豪華嘅包廂入面欣賞舞台劇，聽聞咁樣先至夠莎劇風情喎。
舞台劇完結後，姬妮芙換咗套紅色晚裝現身，重同查理斯老友鬼鬼，兩個人雞啄唔斷。今次姬妮芙為查理斯嘅慈善基金籌到十五萬七千英鎊（約一百九十三萬港元），總算有個交代。