打風半日市，恒指有36點進帳。除咗啲零售股因為自由行概念癲鳳鬥狂龍之外，地產股算係硬淨一族。
4大地產股除咗冇輪嘅新世界（017）之外，其他3隻，隻隻升。恒地（012）、長實（001）與新地（016），依次升1.5%、1.2%同0.4%。近排樓市好似賣魚佬冇沖涼──有啲腥氣（聲氣），似有見底迹象，即使唔反彈，亦都唔易繼續沉落去，地產股生猛番好應該。
地產股Call輪隻數唔少，但好多大成交嗰類都屬於另類輪，普通人唔識玩。其他正常嘅，因為已升得唔少，槓桿率細晒，又或者發行商收番好多，散戶參與買賣愈來愈少。
恒地、長實、新地Call輪各選一隻，細細注玩吓。恒地Call輪揀9648，10月到期，輪價20.3仙，溢價2%，槓桿率14.9倍。長實Call輪揀9756，明年3月到期，輪價1.05元，溢價1.8%，槓桿率5.9倍。新地Call輪9740，10月到期，輪價97仙，溢價0.8%，槓桿率5.9倍。呢3件都係低溢價輪，交投較疏。
章盛