做得娛樂圈呢行嘅，人人都想紅㗎啦，但有個男歌手就幾好笑，其實佢唔差，只可惜佢唔夠實事求是，成日諗住走捷徑，想同傳媒打關係早啲上位，結果搞到一鑊泡。
馮仁昭聽聞男歌手之前為咗擦鞋，除咗大送LV袋畀人外，重特登搵人去電台大派手提電話，送畀啲DJ同高層，而呢個手提電話款式都唔太老土，加上又有專人送到，所以有唔少電台中人都有收過呢部手機。
不過，近排娛樂圈風聲鶴唳，電台中人就狂摷櫃桶底，將男歌手以前送嘅手提電話、重有名牌袋同波鞋，拿拿聲拎出街放或者送畀人，以免無端端惹起麻煩。
F4嘅周渝民（仔仔）最近經常出現為台劇《狂愛龍捲風》宣傳，搞到好多言承旭（Jerry）迷近排成日問點解偶像失咗蹤。馮仁昭問過，原來Jerry忙於錄音，佢張處男大碟會喺年底推出，佢嚟緊重會出席兩場百事活動，分別係十一月一號同周杰倫一齊喺廣州嘅百事巨星見面會，十一月十五號就一個人喺北京搞見面會。仔仔亦唔執輸，佢十一月十三號都會嚟香港做見面會㗎，第二張個人大碟喺今個月出，總之各自各精采啦。
一直有傳會喺九月一日離職嘅環球高層陳少寶，噚日叫埋佢個好拍檔朱國禎，一齊喺公司樓下同記者見面，澄清佢離職嘅傳言。但係少寶就要約記者喺側門等，因為佢話唔想咁揚喎。佢話好多謝公司對佢同各員工嘅支持，而且重叫記者以後收料要索真啲先好寫。
歌手兼DJ嘅葉文輝﹙啤梨﹚一直都有一大班外籍女傭fans捧佢場，不過可能噚日唔係星期日，所以佢去到旺角派月餅時就只有一大群啱啱放咗學嘅女學生到場支持。啤梨話呢兩年都冇拍拖，所以佢都好想搵番個女朋友，等中秋節時可以一齊去曬吓月光。但係當記者一提到佢個緋聞女友嘉碧儀，啤梨就即刻表現得好尷尬咁話唔識點講。
張達明噚日喺路訊通嘅辦公室宣傳一個叫《中國奇人奇事》嘅節目，個節目其中有部份係介紹少林寺，咁達明就即刻借題發揮，大話西遊二指禪、童子功，佢話：「唏！我喺屋企都成日練一指禪，就係點我個仔做嘢。」之後佢又無厘頭咁話：「我練童子功練到三十歲，因為我外父好惡，我又住喺屋企，同埋嗰時都冇咁開放。」
林心如將會同韓在石合拍新劇《紫藤戀》，佢兩個噚日喺台灣第一次見面時好尷尬，心如同韓在石坐喺梳化兩端，好似搭枱咁。問韓在石點睇心如，佢竟然連講三次心如真人靚過上鏡，心如就讚韓在石睇起嚟好成熟，咁樣互笠高帽，睇怕呢次實傳緋聞，點知心如話：「不可能，我們語言不通。」韓在石聽見後竟然鬆一口氣，梗係啦，傳聞佢女朋友係《假如愛有天意》嘅孫藝珍，都唔差㗎。
