劉嘉玲、朱茵、張栢芝、張文慈和蒙嘉慧昨日齊齊出席新片《性感都市》記者會，五女各出奇謀，實行以性感打扮搶鏡。朱茵表示她在這齣以《色慾都市》作藍本的新片中，角色最賤，經常想侵犯陳冠希。而劉嘉玲提到男友梁朝偉日前與張曼玉撐枱腳一事時，即表現得十分𤷪𤺧。
劉嘉玲、朱茵、張栢芝、蒙嘉慧、張文慈、許志安及王晶等，昨日齊往黃金海岸為新片《性感都市》試戲後，即席舉行記者會。一眾女星均以性感打扮示人，其中現年三十七歲的嘉玲，身穿一襲白色大低Ｖ及大露背的長裙，性感誘人，成為全場焦點，絕不比現年二十三歲、穿上大露背超短裙的栢芝輸蝕。至於三十一歲的朱茵雖然穿上西裝背心，但卻露出黑色蕾絲胸圍搶鏡。
栢芝封嘉玲為「波神」
而蒙嘉慧和張文慈也不示弱，前者穿上tubetop配襯魚網衫，後者則以一襲透視長裙示人，明顯可見她裙內所穿的比堅尼褲及誘人長腿。不過，栢芝影完大合照後即拍手大叫：「好嘢，夠喇。」然後便掩胸快步離去，未有接受訪問。
除嘉玲外，所有女角均會在片中穿上比堅尼示人，栢芝在戲中會稱呼嘉玲為「波神」，朱茵則是「波聖」。朱茵昨日更形容自己在戲中的角色相當賤，經常想侵犯陳冠希，似乎與美國人氣劇集《色慾都市》（《Sexandthecity》）中對性十分開放的Samatha甚為相似，而朱茵在片中演作家，又與《色》劇女角專欄作家Carrie雷同。問到朱茵會否怕拍罷此片，以後都會被稱為「波聖」時，她說：「唔好啩，叫番朱茵親切啲。」難道她覺得「波聖」之名受之有愧？朱茵說：「唔係，我唔想搞到同人有距離啫。」
朱茵咀到陳冠希面紅
朱茵透露她在戲中與陳冠希（Edison）及飾演陳父的許紹雄關係複雜，陳冠希兩父子都同時迷戀她，朱茵說：「我喺戲中係個小說作家，成日寫鹹濕故事，寫咗兩本書叫《沒有乳房的女人》同《沒有陽具的男人》，性格又好賤，成日想『擒』Edison。我同許紹雄有場搞笑床戲，另外有個鏡頭係我想咀Edison嘅，但失敗，Edison拍到面紅㖭。」
而嘉玲表示昨日因與梁家輝試拍一場結婚戲，故身上的白裙其實是一襲結婚禮服。嘉玲說：「我專幫另外三個女仔解決問題，我自己就唔使睇心理醫生，不過平時睇醫生，醫生都成日話：『你明唔明我講乜？』我咪學咗呢句囉。」
嘉玲不耐煩頻呼幼稚
提到在片中被稱為「波神」一事，嘉玲即說：「朱茵先係。」記者表示朱茵是「波聖」後，嘉玲又說：「即係咩？好身材？咁我又唔差，成身比例啱咪得囉。」
此外，嘉玲被問到其男友梁朝偉日前與張曼玉撐枱腳一事時，她說：「你又點睇呢？卒之都問呢個問題，我係唔會答嘅，我冇乜點睇，好好笑，大家將呢樣嘢講得複雜咗，係都要製造啲嘢出嚟，係屈嘅。」再問嘉玲事先可知偉仔相約曼玉晚膳？她即露出一臉不耐煩的表情，𤷪𤺧地說：「我唔會再答，我覺得好幼稚。」
而王晶被問到《性》片是否以《色》劇為藍本時，他說：「嗰齣戲比較生活化，我哋就故事性強啲，對白都好露骨，講男女對性嘅睇法同對高潮嘅描述。」
採訪：陳梅香、何永寧 攝影：林德雄
