早前明窗出版社出咗本《神話背後——李澤楷》，書中有小小超李澤楷事業與家庭的秘聞，本書出版後，小小超發過聲明，但從未親口評論過半句，噚日佢出席電盈董事總經理蘇澤光母親蘇鍾妙英的追思會，終於開腔。
小小超說：「我一路冇親口講過，第一，呢本認真係神話定漫畫都唔知，內容同實際事實差距好大，你話唔理當小說睇，亦令我好唔開心，即係將虛構嘅事夾硬講到係我家人同我嘅私事，揑造得好多，寫嘅人咁做好唔負責任，令我好唔開心。」記者問小小超有否提供資料給作者？佢話「絕對從來冇同呢個作者交談過。」佢𠵱家重研究緊會否採取法律行動。
小小超承認自己睇過本書，但未有看畢，佢話利用名人嘅知名度寫書賺錢好流行，作者有想像力、創作力，亦好唔負責任。小小超愈講愈嬲，「有啲人一知半解，好心做壞事，家庭對我嘅支持絕對好大，我爸爸亦都好栽培我嘅事業，由始至終給予好多根本性嘅支持，有人睇到書中嘅相片，妄測我有份參與」；佢話大部份相係由新華社出版社出嘅《李嘉誠畫冊》攞出嚟，至於私人相片，就仍然在查來源。
（圖）李澤楷噚日打破緘默，批評《神話背後》一書歪曲事實。佢身旁係電盈公共事務總監馬潔嫻。
何國豪攝
傳真︰2623-9278
電郵︰