被商台譽為香港第一才子嘅陶傑呢輪全方位出擊，一方面為電台主持新節目，又以雜誌嘅顧問身份上雜誌封面，現身說法講佢自己嘅認同危機，真係幾新鮮。
陶傑深得Tom仔大股東周凱旋小姐欣賞，佢哋合夥嗰間《威震四方》公司最近準備出版一本仿日本式、以上班一族為題材嘅愛情漫畫書，叫做《男女關係》，香港人受唔受落重未知，不過，噱頭就夠晒，由陶才子負責編劇，黎達榮負責畫公仔。以陶傑咁鬼才，男女關係呢科嘢肯定考佢唔起，不過，八方怕佢難忘董伯伯，唔知最後會唔會將老董同董太嘅風流韻事都寫埋入去，果然一翻試刊號，就係由7.1大遊行做引子。
除陶傑之外，李鵬飛一樣出位，佢喺《茶杯》嘅專欄今期最後一集，題目係《我認識的董建華》，講乜大概大家都心照啦，梗係六年嚟香港冇好過，更嚴重嘅係佢話「今天的董建華已不是我六年前認識的董建華了。」
傳真︰2623-9278
電郵︰