久唔久就有讀者問一個好簡單嘅問題，就係大學網址，譬如上星期一位老友就嚟電郵問Foothill與USC（南加州大學）嘅網址。請你哋上Google.com一搜尋就知，唔使問人嘅。Foothill就係FoothillCollege。南加大係UniversityofSouthernCalifornia。
恒隆集團宣佈中期業績，賺十億元，不過不失。主席陳啟宗次次見記者都有嘢講，呢次講明如果政府唔明確公佈明年是否恢復勾地，恒隆可能被迫往內地發展，一於走資。陳啟宗聰明絕頂，一早睇到地產市道會跌，所以九七前唔買地，積存大量現金達幾十億元。上次地價大跌之後，董先生話政府唔賣地，陳啟宗揸住啲現金，冇生意可做，唔知點好，咁聰明嘅人都俾董先生玩殘，何況一般投資者吖。
陳先生嘅發言，八月二十九日見報，當日下午四點十五分，佢隨世界第一流嘅管理顧問大前健一（KeinichiOhmae）去見董先生，唔知會唔會乘機進諫呢？大前健一乃一流策略家，可以畀董先生好多意見嘅，只不過麥肯錫已為香港把脈，交咗個報告畀董先生。如泥牛入海，大前健一以前係日本麥肯錫嘅明星顧問（已辭職多年），佢嘅意見唔知會唔會同麥肯錫大同小異呢？董先生可能聽完之後，又掛住推動居屋變旅舍，無心裝載咯。點解由USC網站講到陳啟宗？皆因佢係USC最知名嘅亞洲校友，花旗集團嘅新CEO又係此校友，故此聯想起嚟啫！