智利國腳沙拉斯同埋加達美斯，前日都喺阿根廷聯賽中受傷。由於智利今個禮拜六就同阿根廷響世界盃外圍賽中交手，有口痕佬賽後就話係班阿根廷佬有意整傷佢，等佢哋兩個踢唔到呢場大波。呢個陰謀論信不信由你，我求大俠就覺得，以今時今日阿根廷嘅實力，使唔使咁做呀？
話說競賽隊中場加達美斯同埋河床嘅沙拉斯，喺禮拜日比賽都遭到粗暴攔截，前者左腳傷得幾嚴重，據講要唞半年；後者就拉傷右腿肌，恐怕都對唔到阿根廷。當然，我求大俠打死都唔信阿根廷會放智利在眼內，再講，阿根廷大軍以外流球員為主，國內班球員會唔會咁愛國以身犯險整傷人吖？
綜觀禮拜日幾場首輪意甲賽，戰果幾大路，強隊中只有國際米蘭贏摩納德較驚險，要到完場前至靠韋利同埋馬達拉斯入波食到尾胡，上盤客真係驚足全場。韋利賽後好躁，埋怨隊波創造力唔夠，話唔應該場場靠晒佢贏波。呢句話說來自傲，但諗深一層又確係事實，同意！
英格蘭點兵備戰本周末中對馬其頓，李斯特城龍門獲加榜上有名。獲加開季到𠵱家失球唔少，啱啱至慘敗於維拉腳下，連佢都獲重召證明國家隊唔多夠龍門。不過獲加入選亦唔應該開心得太早，好似上次基克蘭入選後亦唔見得有咩機會，轉個頭又被除名，講到尾佢哋都係過客。
中國國家隊已經展開於美國集訓之旅，重喺邁亞密踢第一場友賽，結果領先三比二情況下輸三比四。對手係邊隊？中北美洲球隊海地。雖然友賽試陣，但之前對巴拉圭同巴西都唔使失波，家下畀海地入四球，練兵都唔好輸到不設防，話晒都係國際賽，計分㗎！
曼城前晚領先下最後都輸畀阿仙奴一比二，最弊第二球又關孫繼海事。佢自己賽後都承認要為失球負責，重話領隊基瑾賽後同佢密密傾，叫佢下次要大腳清波，唔好犯錯。我求大俠記得「老孫」開季都有兩、三次俾基瑾捉住傾偈，不過就唔係訓話，佢個位應該重好穩陣。