內地客藉自由行嚟香港買樓，近日成為熱門話題，其實，以往都有唔少內地客買香港樓嘅例子。
聽經絡集團行政總裁黃錦康講，銀行承造內地客樓按，條件與港客大致相若，主要係買家要出示內地工作證明、稅單同護照；最大分別係申請人要有港人做擔保。
至於承造按揭，最高係七成，利率可達優惠利率（P）減二點六厘。不過，一定要用港元還款。
黃錦康透露，山頂加列山道早排有一宗三千幾萬銀嘅成交，買家係內地商家，喺香港有生意，以個人名義買入單位，向銀行借七成，供十年，利率低至全期P減二點六二五厘，同一手樓睇齊。
聽講呢啲內地買家，好多喺香港有生意，選擇嘅單位就一手同二手都有。
另外，經絡集團較早前設立「自由行按揭專組」，並夥拍銀行提供度身訂做樓按產品，聽講市場反應唔錯，接到好多查詢，已經處理緊。
市道是否好轉，雖然話見仁見智，但睇見唔少知名人士相繼入市，相信佢哋嘅眼光都唔會差得去邊。
喺政壇有崇高地位嘅鍾士元爵士，日前以四百萬買入何文田豪宅麗豪閣高層單位，面積一千呎，三房連套房，望加多利山翠綠景致，四千蚊一呎，聽講話買畀仔女住。
雖然麗豪閣唔係近期熱銷嘅新盤，勝在坐落喺九龍傳統豪宅區，旺中帶靜，區內物業不但可以保值，重有投資價值，而且亦有不少社會名人聚居。
樓盤由香港興業持有，喺窩打老道九十四至九十六號，啱啱翻新完，現正委託美聯物業發售。
自由行能為香港帶嚟幾多商機，雖然未有答案，但睇吓市場搞嘅活動，就知商機一定唔少。
中原地產今日喺深圳香格里拉酒店搞「中原香港房地產推廣計劃」，邀請咗唔少香港發展商參與。聽聞會出席嘅發展商包括九龍倉、嘉華地產、恒隆、永泰亞洲、長實、華置、和黃同新世界，陣容鼎盛。據聞，唔少內地發展商都會參加，齊齊交流賣樓心得。
中原早排話會同中原中國搞睇樓自由行，今日會公布有關安排，重會分析住宅物業投資環境，同自由行為樓市帶嚟嘅動力。配合呢個大趨勢，全程都會用普通話講解。
內地放寬旅遊限制，料會帶旺香港零售業，不但本港傳媒不斷追訪內地客，連外國傳媒對呢個新聞題材都感興趣，搵咗利嘉閣董事總經理何紹章做訪問，了解代理點睇自由行、CEPA同放寬內地客外滙出境限制嘅影響。
何紹章全程用流利英語對答。CNN重訪問埋跟利記睇樓嘅內地商務客，一於嚟個貼身追擊。呢個訪問遲啲會有得睇，想知道何紹章點睇呢個熱潮，就要多加留意。
自由行旅客鍾意購物，零售業當然好景，做舖位租售嘅代理行都受惠。中原（工商舖）地產代理董事總經理陳雁樓話，公司八月份佣金千二萬，係今年單月新高，比七月升咗超過一成七。當中以商舖部最多，收五百八十萬，佔咗整體四成八，佢話係自由行所賜。
不但商住物業旺，工廈物業表現都唔錯，例如屯門田氏廣場，上個月促成咗二十一萬呎租務成交。
蘭西
電郵地址：
