上周五恒指破位，趙飛雲高位追入滙豐（005）及中移動（941），雖然即時有錢賺，其實亦怕中正大戶陷阱，曾提過恒指破位，形勢利好，但高位入市，提防反覆。
港股噚日高開低收在意料之內，不過卻出現最不想出現的局面，就係大部份藍籌上升，滙豐獨憔悴的局面，滙豐全日跌1.50元，收100元，拖累恒指由最多升136點，變為倒跌5點收市，報10903。恒指日線圖營造「射擊之星」，只看今日港股會否以大陰燭下跌。
有老友笑趙飛雲「黑摩利」，主要是沽九倉（004）換馬高追滙豐，雙重損失。記得董驃在澳門開倉時，有隻馬由佢改名，叫做「仗義執言」，相信是以馬言志，但仗義執言易得罪人，很多時要付出代價。不過馬迷愛戴董驃，亦在於他敢於冒犯權貴，仗義執言，今番重出江湖在香港講馬，趙飛雲當然繼續捧場。
港股噚日午市回吐，身邊不少散戶拍手叫好，反映有貨的散戶不太多，加上大行老友表示，資金仍源源不絕流入港股，傳聞有歐資基金追買港股，但求該股無大跌風險便收貨，所以不少質素平庸的股份亦無厘頭大升。若所言非虛，則港股短期不愁大跌，因此尾市只沽出滙豐Call輪9845計數，如果聯想（992）守穩3.175元，亦可先買1注。
阿虎