港股衝上11000點大關，最高11039，升130點，但高位有壓力，結果倒跌5點收場。今個升浪，恒指首次挑戰萬一關阻力，無功而還，係好正常，呢個水平點都要反覆整固，消化獲利貨後，先可破位而上。
中國明幫香港，自由行之後，再出多「放水」一招，每年攜帶外幣限額由2000美元增至5000美元，再加埋人民幣、旅行支票同信用卡，內地豪客行一程，用十萬八萬都冇問題，個消費市場重唔「㷫烚烚」？旅遊、酒店、零售同飲食業「翻生」、樓市見底回升，經濟復甦就可寄厚望。
零售業受惠，立竿見影，有關股價噚日亦一飛沖天，最勁係JOYCE（647），大升58.3%，高踞升榜首位，堡獅龍（592）同美麗寶（1179）亦升17%，跟住廸生（113）、莎莎（178）同卓悅（653），都有10至15%進帳；7月底推介卓悅時股價1.08元，現已升近2.0元水平。由於自由行層面會一路擴散，香港受惠程度亦會不斷提升，旅遊同消費股，中長線仍可睇好。
國企股調整，紅籌窗口股接力而上，上海實業（363）搶上13.7元，升5.3%，北京控股（392）升5.8%，天津發展（882）亦升4.0%，呢鋪開到紅籌，龍頭股先行，落後股會跟住嚟。
大慶石化（362）係大慶市窗口公司，佢在7月中升上0.55之後，就打橫行咗成個半月，未升過，噚日卒之見到幾家大行掃貨，搶上0.53元收市，重上10日同20日線之上，只要突破大型三角形0.54元嘅阻力，照度上去，上升目標係0.75元。
大慶有消息，佢同渤海重工葫蘆島造船廠合作的新廠，質量測試完成，好快就正式投產，新廠主要生產海上專用防腐塗料，年產量15000噸，專供4家大型造船廠之用。另外，杭州灣大橋第一期防腐塗料已開始供貨，整個大橋投資118億元，防腐工程約佔10%，集團競投餘下合約佔有優勢。
03年度（6月底止），估計大慶盈利9000萬元，每股盈利10.2仙；04年度，防腐塗料提供更大貢獻，盈利可上升至1.2億元，每股盈利13.5仙，石化股PE多在10倍以上，以保守的6倍計，今年底大慶股價已可見0.8元。
郭兆誠