財經事務及庫務局局長馬時亨呢排可謂驛馬星動，上兩星期去完美國探望女兒後，聽日又要飛，不過今次係公務，去泰國布吉島出席亞太經合會議嘅財長會議，對於呢啲「蘇掃」場合，馬局長肯定駕輕就熟，雖然𠵱家泰國好熱，但出席完會議後局長話會去曼谷探朋友。呢輪有雜誌話曼谷有位淫業大亨，睇來局長要小心啲，如果唔係水洗都唔清。
講番馬局長美國之行，咁啱佢飛去紐約就遇正美國大停電，航班延誤之餘，去到酒店冇嘢食，又冇熱水沖涼，好彩第二日回復正常。佢話七七年喺紐約做嘢，都遇過大停電，點知今次又撞正，因此佢話都係香港好，貴啲電費都值得。
講開雜誌，聽日復刊嘅《東周刊》正式出版，原來馬局長好想先睹為快，但係佢飛上晝機，驚住買唔到。佢話創刊號通常有勁料爆，所以特別關心。
傳真︰2623-9278
電郵︰