喺即將舉行嘅法蘭克福車展上，法國標緻車廠將會展出全新407Elixir概念車；此車除流露有雙門Coupe跑車嘅誘人魅力外，強而有勁嘅性能表現，亦教人對其留有深刻印象，不如𠵱家一齊嚟先睹為快啦！
以造型而言，全新標緻407Elixir概念車可謂極為流線型，加上21吋巨型跑車合金胎軨，以及雙出式跑車尾喉配搭，完全能夠凸顯出其雙門轎跑車形象；然而，低斜而明亮嘅頭燈襯以闊大鬼面罩，望落亦令車首設計具有一份懾人魅力。
廠方為407Elixri概念車，裝配一台全新2.7公升HDi柴油引擎，不但能做到有超過200匹馬力及44.9kgm扭力輸出外，而且重有低廢氣排放及低耗油量嘅特性，加上一套Tiptronic式嘅Sequential半自動波箱，更能為你帶來無窮嘅駕駛樂趣呢！
由於車身尺碼較大（4734×1920×1400mm），而軸距又長達2725mm，故此車廂空間倍見寬敞闊落，就算坐滿四名成人都不覺擠迫；另外，車廂設備又見齊全，當中包括有天幕式車頂、DualZone恒溫冷氣及導航系統等等，絕對稱得上係一應俱全㗎！
