食菌當補品
潮流講健康，「優之健美食」由雲南引入15種珍稀野生菌、日本人視為聖品的松茸、歐美大熱、清熱養血的牛肝菌等，以鮮魚湯米線、燒焗、雲南小菜等方式製成新菜式。（地址：中環威靈頓街55號地庫；電話：27723252）
記者：陳慧敏
攝影：林栢均
記者：馬慶武 攝影：陳盛臣
Doris在香港生活，擁有自己的時裝生意；Giorgio在意大利出世、生活、當繙譯工作；兩個中國人偏偏相遇於意大利，展開他們的愛情故事。Giorgio憑一手好廚藝，全心全意為Doris弄最好的菜式而感動她；7年後，現在他們結了婚，故事移師香港延續。
在意大利相遇，原來係因為工作關係。當時Doris每個月都會去意大利為其時裝店入貨，Giorgio則充當繙譯，工作以外，Giorgio會盡地主之誼同Doris去玩吓食吓飯。經過數月後，二人已由朋友發展成情侶。「不過之後我唔使去意大利公幹，但係又掛住對方想見面，所以嗰陣時一係我飛過去搵佢，一係佢飛過嚟搵我，嗰排淨係買機票都使咗好多錢。」Doris話經過咗幾年飛嚟飛去嘅生活，佢又放唔低喺香港嘅生意，所以最後Giorgio就決定為咗日日見到Doris而嚟香港定居。
Giorgio放棄喺意大利嘅工作嚟到香港，講廣東話都未正、又唔識睇中文，實在無乜工作適合佢。而因為佢哋常常都會請朋友返屋企食飯，朋友們試過Giorgio嘅廚藝都讚不絕口，於是就提議佢搞番間私房菜，而Giorgio亦決定發揮佢最鍾意最有把握嘅廚藝，將興趣變成工作。
廚藝了得嘅男士果然特別受女仔歡迎，自稱煎蛋都唔識嘅Doris就話：「我雖然一向都知Giorgio識煮嘢食，但係無諗過佢咁叻。直至識咗佢一年後，有一日返到屋企，見到佢竟然自己整麵包，真係好驚喜，原來佢煮意大利菜好勁㗎！之後嚟到香港，佢就更多時間煮嘢畀我食，不過我淨係識食咋，煮就唔好搞我。」一個愛煮，一個愛食，果然夾到絕。
Giorgio廚藝咁了得，原來因為佢父母喺意大利開中國餐館，自小已受感染。不過佢自己就鍾情意大利菜，始終Giorgio係喺意大利出世、讀書，所以較了解意大利文化，連英文名都係意大利文。而講起Giorgio唔識睇中文，咁佢點去買餸呢？「所以我去開嗰間舖頭就會記住佢啲價錢格式，即係幾多斤幾錢呀，咁我下次去淨係睇數字都明。」不過Giorgio話自從開咗呢間私房菜之後，多數大量由外國訂貨，已經好少自己去買嘢喇。
Room12
電話：61782619
價錢：$280/位（5道菜）（須預先訂位）
地址：尖沙嘴海防道海防大廈3字樓12室
