一眾零售股，繼續受惠自由行概念，炒到異常興起，好似先一排經紀黃品題過嘅廸生創建（113），在某歐資行出報告唱好後，股價勁升15.6%，收5元，再創今年新高。
歐資行話廸生唔係純粹炒概念，有實質業務支持，重估今明兩年盈利會正到你唔信，所以目標價set到去5.62元咁高。由於呢間歐資行呢排當旺，好似早排推介遠東發展（035）後，股價勁升，所以今次廸生就算高處未算高，一啲都唔出奇。
早前有傳聞，有人想廸生批股。小初心諗，廸生家陣現金充足，應該冇乜集資需要。但經紀黃話，家陣潮流興賣舊股，如果價錢吸引，相信大股東亦會心動。
另外，由創業板轉至主板嘅華翔微電子（1195），噚日尾市時，突然出現大手成交，每股造1.15元，有成20球咁多，而隻股亦繼續近排升勢，再升8.4%，收1.29元。
經紀陳話，聽聞呢手貨好似落入芬佬之手，所以大家不妨留意走勢。
慕容小初