我係一個電視迷，冇咗電視就周身唔自在，最近追看祖兒套《美麗在望》，就搞到連「辦大事」嘅時間都冇，好在最近BenQ推出一款無線LCDQ150，大賣流動性，可以拎住周圍睇，以後無論辦公事定喺洗手間辦大事，都一樣有好戲睇！
記者：許福合
攝影：黃子偉
ImageBoy：Benny（Space2）
BenQHK 查詢電話：23306929（EXT201）
電腦發明時，顯示器一直同電腦兩為一體，大家都習以為常，但隨着電視功能日強，娛樂打機睇戲一樣掂，試想LCD可以出得廳堂，入得廚房，幾咁好用過癮！BenQ推出嘅Q150就捉住用家嘅渴求，加入無線功能，只有使用無線影音傳輸精靈，就可以行到邊睇到邊，無論電腦、DVD、VCD及錄影機畫面都可隨身攜帶，淨係唔使通屋拉線已經夠晒吸引。
BenQ無線影音傳輸精靈由發射及接收器組合而成，雖然同樣用色差線接駁，外形亦相似，但發射器要接上影音裝置，而接收器就要駁好Q150。一般家庭嘅影音裝置都會放於客廳，睡房廁所隔住牆，不過因為使用咗2.4GHz調頻紅外線遠距離影像傳輸技術，接收範圍可以達到100至300米，唔使擔心會有死角盲點！另外，接收器配備遙控器，坐定定就可以遙控操作，照顧周到。
BenQ今次呢部Q150立心省靚招牌，自然絕不馬虎，好似一般用家作分辨LCD高低嘅亮度及對比度，就達到450nits及500：1，加埋內置逐行掃描功能，畫面光亮之餘，亦較為穩定，未有閃爍嘅情況，相當理想。有隻靚芒，當然唔少得睇DVD過吓戲癮，為增強電影感，內置3：2PullDown還原功能，將DVD回復至每秒60格播放，畫面更暢順，亦可幫助消除鋸齒情形。Q150除咗基本嘅左右立體聲喇叭外，背後更內置重低音喇叭，有如置身槍林彈雨中，睇戲自然更投入。
抵讚：畫質仍然保持水準，黑白位實淨兼分明，再加埋低音喇叭，打機睇戲效果一流。
要彈：雖然加上無線套裝可以周圍睇電視，不過若能內置於顯示器內就更吸引。
