雖然小初最近已經趁市旺沽咗唔少貨獲利，但若有新消息收到，又冇咩理由唔聽，若果覺得堅的話，又冇咩理由唔跟風落小小注碼，所以班經紀朋友都笑小初，炒鬼本性點都改唔到。
上個周末，經紀黃品題咗泳衣股德發（928），佢話雖然工業股呢排氣勢有點回落，但隻股搵咗班基金同埋炒家幫手，所以雖然早排大股東以大折讓價配股，但都夠力炒上。若然市況就的話，真係三扒兩撥就見1元。
德發上個星期初，由大股東以每股0.7元，配售1.64億股舊股，批股份計埋佔成12%咁多，故此隻股股價在復牌後一度回落，但為咗成功配股，所以炒家努力頂住，若果唔係容乜易班芬佬唔happy？
上個星期五，班炒家再度發力，成功將德發股價推咗上0.89元，升咗8.54%，成交股數有52.85球，金額45.84球，實在可以見到佢哋嘅功架。
之不過咁，德發舊年底發行過一批可換股債券，所以有小小擔心人哋會唔會趁價高沽貨。
慕容小初