LG今年個勢真係好勁，唔單止新機一籮籮，而且功能重愈嚟愈勁，但係估唔到被稱為三星P408強敵嘅G7100都喺香港出現，雖然基於保密關係完全謝絕採訪，但係羅新基都趁機過吓手癮。G7100同P408一樣有個扭擰65,000色彩芒，最得意就係鏡頭放喺機身左邊，而且旁邊重有個閃光燈，比P408更為優勝，想影相時就要打直拎部機，好似玩DV咁，而640×480解像度喺手機睇都唔差得去邊，外芒就用256色黑底彩芒，不過就唔可以用嚟影相。其他功能亦都唔弱，MMS、GPRS、WAP、JAVA都有齊。希望LG快快手喺香港推出，唔好等羅新基流口水流到一地都係。
各大廠嘅超細型手機出完一部又一部，韓國Maxon就推出超細摺機A801，外形比PanasonicG50重細成個碼，放落手袋都真係有排搵。不過針無兩頭利，想要細功能上就唔可以要求太高，所以A801只係用雙黑白芒，其他功能就有16和弦、GPRS以及WAP，不過以$1,250就有部超細摺機，對於只係要求打出打入就OK嘅用家都夠用。
查詢：23902680（星匯電訊）
每個手機用家唔多唔少都會買手機配件，小至Handsfree、大至充電座甚至汽車充電器，最近SonyEricsson就推出P800配件套裝，有齊Handsfree、皮套同手機繩，不過最特別就係有三支P800嘅Stylus，唔通SonyEricsson知道用家會成日跌筆，所以一次過畀夠三支，等用家跌完再跌都重有得用，都相當細心。
查詢：23987320（鉑匯科技）
