上月初，好多人估港股會調整，又話基金經理放假股市會淡靜，結果恒指8月初跌咗1個禮拜就急速反彈，之後15個交易日升咗12日，重日日過百億元大成交，最後恒指收10908，大升774點，升幅7.6%。單以點數計，係過去5個月升市中最多。
趙飛雲等港股回吐買貨，等到頸都長，上周五見港股走勢出現突破，終於在10800以上追入滙豐（005）及中移動（941），買入後即時有錢贏，但仍有挫敗感，散戶始終被大戶牽着走，大戶唔買貨大市唔升，大戶唔沽大市唔散。
不過睇番張恒指月線圖，唔開心嘅感覺就稍為沖淡。恒指經過5個月上升後，10月線由跌轉升，9RSI現時升至60.87，重有大把上升空間，向上望要到12000水平才有較大阻力，一旦破位，一個新牛市的誕生，大概可以確立。
上周五聯想（992）大升8.9%，收3.35元，成交高達2.71億元。技術上，聯想日線圖升破雙底頸線，出現重大突破，短期守穩3.175元，可展大升浪，雙底量度升幅可見4.50元，由月線圖看，剛巧是50月線阻力。其實由月線圖看，聯想走勢和恒指一樣惹人憧憬，經過3年多的下跌，技術走勢終現轉機，股價重上10月線及20月線之上，9RSI升至58，MACD線升穿訊號線開始擴闊，均屬長線的利好訊號。不過，從基本因素看，現價PE24.7倍，預計亦高達21倍，業務需有新突破，才可支持更高股價。
趙飛雲