同人唔同命，自從韋斯咸炒咗羅達之後，搵返名宿布祿瓊領軍，即刻轉運，上星六又贏波，作客都贏葉士域治二比一，唔到你唔服！
自從韋斯咸降落甲組，將啲主力一個又一個賣走到其他球會後，要今季即刻打番上英超聯真係唔易，喺球壇咁多年嘅布祿瓊，當然深明要帶起呢隊波，絕對唔係一件易事，所以就算好多韋斯咸球員服佢，球迷又表態想佢教，都始終無意思領軍。
不過，我求驗客就覺得，既然布祿瓊可以帶住韋斯咸連續兩場贏波，上季尾連場護級戰都唔使輸，證明佢真係好適合隊波，話晒佢又係以前韋斯咸名將，咪當幫吓舊會囉！
前晚德國盃第一圈就即刻爆咗場大冷門，上屆亞軍嘅凱沙羅頓作客輸畀業餘球隊不倫瑞克一比四出局，認真羞家。凱沙羅頓季初因多次違反球員工作證及球會牌照條例，俾足總扣三分，成為聯賽唯一無分球隊，認真唔掂，我求大俠都勸各位波友，想贏錢真係留意對家囉。
季前養傷嘅車路士中場比堤，前晚聯賽主場對布力般時終於復出，有機會上陣後備入替杜夫，點知上陣無耐就俾費歷哥夫開踭打爆咗個嘴唇「見紅」，搞到要出場治理，但就好快入番場繼續搏殺，𠵱家車路士中場咁多人，馬基列尼又嚟埋，難得有上陣機會，梗搏老命啦！
前晚西甲開鑼，波友都將注意力放喺碧咸同皇馬度，皇家蘇斯達就唔係太多人理，結果只係迫和愛斯賓奴。不過，高華斯域個入波，新加盟嘅南韓國腳李天秀功勞最大，啲西班牙傳媒重話呢位「南韓碧咸」表現搶鏡，絕對唔輸蝕。我求大俠幾睇好李天秀今季會有幾好發展。
因傷冇參賽嘅古妮高娃近日同電視台做兼職記者，採訪美國公開賽嘅花絮，點知做唔夠三日就冇做。據聞呢位俄羅斯靚女覺得訪問番自己嘅同行好冇癮，加上成日飲飲食食，好易變肥婆，於是劈炮唔撈，但亦有傳媒話因為電視台覺得佢表現唔係咁理想，三日合約期滿就冇續約。