踏入九月，我羅拉就諗起秋天到啦！唔知係咪啲熱氣吹晒去歐洲嘅關係，今年日本人搶先感受到秋涼，難怪日本女星早就着晒秋裝，當中又以rock女look最hit。
𠵱家做星最緊要有時裝sense，連我羅拉都知今個秋冬勁興黑色同紅色，而三大最紅嘅歌姬步姐濱崎步、中島美嘉同BoA，呢排出現時唔係「皮聲皮氣」，就成身粗鐵鏈，而佢哋嘅共通點就係都以紅黑為主色。
當中又以步姐嘅rocklook最性感，不嬲冬天都鍾意喺衣着上搖滾一番，今年佢都唔例外，重好慷慨咁猛露條小蠻腰出嚟，步姐話逢係D&G嘅秋裝就入硬貨，而今季ＹＳＬ嘅皮褸，雖然要成兩萬銀港紙，都好買得過㗎！
中島美嘉夏天就成日着到成身麻布，反而秋天就露吓光滑香肩，輕輕一挨鐵騎，夠晒不羈。佢唔會學步姐要着大名牌，呢身打扮全部係JilSander。至於話晒都重係小妹妹嘅BoA，當然唔急騷女人味，所以選擇HipHop味道嘅黑Jacket，當堂有種粗獷feel。