星座同政治有乜關係呢？巨蟹座阿董係咪唔啱做特首？八方噚日去到旺角，見到一班着住橙色衫嘅年輕人，攞住支咪，不斷叫途人講低自己個星座，話幫佢哋查吓有冇從政嘅能力，八方好奇走去八吓，原來係議政團體「七一人民批」搞咗個「星座批」活動，分析一班政治人物嘅星座特質同表現。
經過佢哋認真分析之後，竟然發現有唔少立法會議員嘅表現，根本同佢哋星座特質一啲都唔符合。就講屬金牛座嘅曾鈺成，決定咗嘅嘢應該唔會動搖先係，但睇佢7.1前後嘅言論兩邊擺，立場一啲都唔堅定。
又好似山羊座嘅黃宜弘，應該係處事謹慎又重視紀律，好識得抑制自己，但係睇佢喺立法會門外豎起隻中指，就知佢根本冇山羊座嘅特質。
至於理論上應該富有改革精神嘅水瓶座議員陳鑑林，一睇就知冇革命家款啦。重有雙子座嘅李柱銘，點睇都唔係星座講到咁八面玲瓏，反而重幾老實㖭，如果唔係都唔會𠱁唔掂阿董啦。
講開阿董，巨蟹座嘅佢，性格同星座書分析嘅就最切合：溫和內向，重視家庭同和諧，而且成日會聽取意見。係就係聽，但聽一邊唔聽一邊嗰度衰啫！做領導人就真係唔掂，唔會因為星座累事啩！
傳真︰2623-9278
電郵︰
