商台同港台近日玩埋身擊，互搶節目主持人。呢邊廂，商台搵咗「香港第一才子」陶傑由今日起，晚晚坐鎮主打，節目重改咗個大名叫做《精英輩出──群雄決戰光明頂》。搞到咁激，港台都不敢怠慢，急急推出一個《開心晚報》嘅新攻勢，重挖咗以前喺商台幫查小欣嘅梁德民做主持。
港台嘅大公關話，佢哋個節目由夜晚十一點半開始，一直講到兩點半，實行同對手大比拼，內容由國際視野到財經到娛樂體育都有。
港台人馬都算勁，有張賽娥、鄧聲興講財經，又搵到董驃講馬、梁守志講波，當然最殺食就係連新鮮出爐嘅報紙娛樂頭條都讀埋。問港台乜咁快手？佢話咪派專人去旺角買《蘋果》頭輪報紙囉。兩大電台要鬥起上嚟，真係唔係人咁品。
傳真︰2623-9278
電郵︰