自由行範圍進一步擴大，今起北京與上海居民來港旅遊，為港股進一步打氣。上周五晚美股又靚靚，恒指上破萬一點應該冇乜走雞。
不過，升得太急嘅話，高價搶Call輪未必有着數，最好吼啲冇乜點升嘅藍籌，然後揀輪，又或者等啲升幅大嘅藍籌稍作調整，再搵佢哋啲Call輪埋手。
上周五提過嘅中移動Call輪與滙豐Call輪，可以繼續留意短炒。理由係中移動（941）落後，有機會追上大隊，而滙豐則喺100元以下調整過後再展升浪。中移動Call輪對象係9861，滙豐Call輪對象係9845，呢件係搏殺格，想冇咁搏殺則揀9836。中石油（857）派成績表後靚仔非常，前一排推介兩隻Call輪9232與9797，唔覺唔覺，非常出色，未因槓桿率細而失色，係因為正股升得夠。
中石化（386）亦叨吓中石油嘅光，大幅反彈。日前話半年盤數未如預期嘅消息，已告淡化，重有得睇。不過要揀Call輪落手，唔係太多選擇，得隻成交好少嘅9227。中信泰富（267）派完成績表後散晒，上周五轉番勢向上，收15.00元，有15仙進帳，昅住Call輪9646。
章盛