由萬梓良、柯受良、內地演員陸毅、徐靜蕾同內地資深模特兒陳堅紅主演嘅電影《兄弟》，噚日喺黃埔海逸酒店舉行咗個記招，由於其他演員有工作喺身，所以就只有陸毅同陳堅紅出席，原來做模特兒嘅陳堅紅曾經同金喜善合作拍韓片《飛天舞》，佢話同韓國人合作比同內地演員更加親切，而佢重感覺金喜善真人同上鏡有啲唔同，不過就大讚金喜善上鏡就百分之一百完美。
至於外間一直有傳金喜善整過容，雖然陳堅紅就有聽過呢啲傳聞，但佢就冇答覺唔覺得金喜善整過容，只係話：「韓國整容很正常，我覺得韓國人不整容就很奇怪。我自己都想自己的臉弄尖些，但醫生說弄了也不會有太大變化。」
此外，陸毅有份拍攝王晶新戲《性感都市》，佢喺戲中會同蒙嘉慧有較多對手戲，不過就冇情慾戲份，佢重笑住話唔會因此覺得失望。
由朱茵同埋吳鎮宇合演嘅《心寒》，遲啲會公映，聽講部戲好鬼嚇人，導演重笑住講話有場戲喺停屍間拍，要支解一具屍體，之後演員睇playback，個個都睇到『揦』口『揦』面，差啲重嘔埋出嚟。而且有一個臨時演員要全裸上陣，但因為要喺低溫拍攝，拍戲期間未roll機嗰時，鎮宇就幫個臨時演員鋪毛巾遮住個『何B仔』。
陳啟泰噚日去咗廣州宣傳亞視新節目《粵港越好玩》，佢話：「呢個節目會喺十月播出，我哋會隨攝製隊去內地好多地方，除咗拍攝好玩嘅地方介紹畀觀眾外，重會同觀眾一齊玩遊戲，我到時會同老婆分隔兩地，但都冇影響，到時互相探對方。」
林嘉欣主演嘅《戀之風景》有份角逐本月初威尼斯影展嘅金獅獎，嘉欣前晚坐夜機，由香港飛往羅馬再轉機到威尼斯，現場有幾個fans送機，重有個女fans送咗條手帶畀嘉欣㖭。嘉欣今次會獲DKNY贊助出席影展嘅晚裝，佢話條裙嘅設計頗為性感：「條裙係大露背，前面就冇帶嘅，好似個胸圍笠落身咁，都唔知點打底！」
