過澳門地盤打工的是技術人員，不是拾紙皮的推車仔族。但傳媒黑工帽子一笠，香港人形象當堂矮半截。以往過疏打埠吃喝玩樂嫖賭飲吹的大豪客金漆招牌，給徹底扑碎，過氣豪客變身黑工，身世特慘情。但與此同時，恒生指數升破萬點，滙豐衝破百元大關。外資分析紛紛調高經濟增長預測，香港邊有咁衰，衰到要過澳門搶細佬飯碗做黑工？
黑工新聞雖然誤中副車，但它確是個警號。中央領導人挺特區領導人，是他們的《東方明珠滙演騷》，激光雖靚，信者失救。為兩餐乜都肯制前世，你唱口好過阿Sam都假，跟你爭這兩餐飯吃的黑工，不但前世肯制，來世都願。賣身賣到像村屋丁權咁，賣身債，永遠償還不來。
轉型能力，中港澳台四地同胞中，以大陸最掂。唔熟水性的年輕姑娘循水路偷渡赴台出事，生還者受訪，無不哭哭啼啼，無知幼稚得令人難以置信但又無限同情。這些怒海餘生者，十居其九，轉頭又會犯險偷渡。黑工與北姑都是受歧視的人種，以人均出口計，大陸居榜首。恨買Nokia15萬白金手機的內地人，人離鄉賤搵命搏。香港人則走精面卡冚卡，碌爆再算。如果大陸銀行發卡隨便過香港同行，偷渡黑工潮馬上斷正，失業蛇頭都要被迫轉型。雖然橫又死掂又死，過程有得揀是自選的，這就叫做自由。