卓先地產最新物業報告話，喺六同七月份，金鐘區總共有十六宗寫字樓成交，總值約一億七千萬，當中銀主貨佔九成，總值八千四百萬，其中力寶中心嘅十一宗成交，銀主貨佔八宗。
卓先測量師行聯席董事潘子明話，力寶中心呎價由最低潮時唔使三千蚊，𠵱家升番到三千二至三千三蚊。市場重出現短炒成交，一名投資者用約三千蚊呎，買入一座三十七樓一室，約二千一百方呎，再以高一成一嘅價錢轉售。
𠵱家力寶只係得番兩個銀主放盤，雖然有買家出價，但係銀主就希望收多少少，所以重未成到。呢個情況最近普遍咗，一般都係加一兩個巴仙，形成拉鋸情況。
潘子明估計，啲銀主盤可能喺半年內賣得七七八八，到時市場點走就較難料。由於卓先都做唔少銀主拍賣，所以佢哋係時候要重新部署，例如做多啲招標同項目投資嘅代理工作。
利嘉閣今個禮拜三，一行十幾人，包括董事廖偉強、董事總經理何紹章，同「至尊豪宅」主席張偉文，上廣州兩三日，拜會當地嘅發展商，強化大家嘅關係，同埋了解當地嘅情況，順便傾吓辦睇樓團事宜。
聽講佢哋重帶咗啲中上價豪宅資料去，同對方交流，了解吓佢哋對邊類物業感興趣，等第時推銷都容易啲。
將軍澳中心以迎接新學年為名，送出二十部每部價值一萬五千蚊嘅手提電腦，畀三房單位買家，聽講反應唔錯，連日吸引唔少家長級嘅睇樓客參觀。
噚日係星期日兼暑假最後一日，特別多父母帶埋仔女去睇樓，作最後衝刺。當大人全神貫注聽代理推介嘅時候，細路就好似甩繩馬騮咁四圍走，其中有三名年紀相若的小朋友，悶極無聊爭位睇模型，表情趣怪得意，蘭西寓工作於娛樂一一攝錄落嚟。
美聯物業精英會上個禮拜去澳門，考察房地產市況，由當地導遊介紹各區樓價同住屋環境，重順道去媽閣廟上香祈福，又品嘗安德魯葡撻等地道美食，重頭戲係參觀澳門塔，其中五位團友KeanChan,SimonLau,CreonKwong,RonaldWong,GaryYeung更攀上三百三十八米高嘅塔尖。今次旅程由執行董事張錦成同會長黎偉強帶領，張執董為讚揚團友攀塔之舉，每人送一座澳門塔精品。
內地買家突然成為香港樓市嘅催化劑，雖則目前佢哋佔買家比例仍然好細，但經紀當然唔會放過，除咗搞北水南調嘅睇樓團外，香港代理迎合內地客嘅服務，都要加強。
美聯就準備搞自由行客戶服務課程，向前線員工分析內地買家嘅買樓模式及財務安排，普通話更係必備環節，名為「普通話成交法」，主要改善溝通技巧。另外，也會探討一系列對中港經濟影響深遠嘅政策，如興建港珠澳大橋、CEPA及自由行等。
蘭西
電郵地址：
