謝霆鋒前晚完成廣州演唱會後，炮轟主辦單位和投資者令陳冠希和鄭希怡兩位嘉賓無法上場；又突然加開一萬個幾乎看不到舞台的側面座位斂財。霆鋒指英皇高層霍汶希知他火爆，故事前隱瞞事件。
謝霆鋒前晚在廣州天河體育館舉行的個人演唱會，原定由陳冠希（Edison）和鄭希怡（Yumiko）做嘉賓，但卻因為批文問題未能出場，但Yumiko亦有到場觀看，不過現場的座位疏落，入座率僅得六成。霆鋒不滿主辦單位的處理方式，完騷後拒絕出席大會在酒店三樓舉行的慶功宴，只去了二樓記者區接受採訪，並說：「慶乜功呀！㷫就有，功就冇啦。」
霆鋒心情很差，他說：「臨出場前個半鐘，先有人同我講因為攞唔到批文而冇嘉賓，我睇住Yumiko化妝set頭，陳冠希取消咗好多嘢上嚟，我要同佢講一百萬次唔好意思。之前宣傳一直講話有嘉賓，搞到我謝霆鋒好似呃人咁，可能有人係想睇Edison同Yumiko先嚟。」
至於入座率問題，霆鋒稱原本只會開草地以及部份座位，但大會卻臨時加開側面座位，所以現場所見有部份座位沒有觀眾，霆鋒說：「我一出場，見到最側嘅兩邊位開咗，已經覺得好奇怪，坐咁側邊根本睇唔到，咁做簡直不擇手段。」
霆鋒續說：「可能Mani（霍紋希）知我性格，所以隱瞞咗我好多嘢，完騷知後先畀座位表我睇，如果我早啲知，可能唔會上台，寧願自己出錢退飛。
「我原本想喺台度講呢件事，但做人要三思而行，咁做太過落佢哋面，落到台之後見到座位表，就完全冇面畀啦，係就係得罪㗎啦，不過係得罪我班歌迷。」
其後Mani解釋，指之前在佛山的演唱會嘉賓是Boy'Z，以為今次亦是Boy'Z，發現錯誤後已即時重新入紙申請批文，而陳冠希在酒店坐至下午六時，到最後一刻仍未獲得批文才離開。而賣票方面，Mani稱原定最貴的門券三百元人民幣（下同），突然變為三百八十元，原定可入場人數二萬九千，並售出二萬四千門券，其後投資者突然要求加開側面座位，臨時加多了一萬個座位，而該批門券則售一百五十元。
記者胡比、林德雄廣州直擊
