大使最近同朋友茶敍，講開香港喺過去幾年，雖然經歷過無數風風雨雨，但大家依然以身為香港人而自豪。因為我哋都覺得，香港人好有愛心，呢種優良傳統，未必可以喺其他地方搵到。
事實上，一次又一次證明，每逢遇上重大嘅天災、人禍，香港人嘅愛心就會彰顯出嚟；不過，大使更加相信，其實每一日，喺香港每一處角落，都發生緊一啲好人好事，呢啲好人我同你都未必認識，佢哋可以話係名不經傳、不問回報嘅「隱形善長」。
大使因為工作關係，經常接觸到呢啲「隱形善長」，佢哋作風低調，做好事從不沽名釣譽，更不問回報。好似一位「X小姐」（呢位善長再三強調唔准大使公開佢嘅真實姓名），久不久就會打電話嚟蘋果基金，問吓有乜人需要佢幫手，無論係金錢或者物資，呢位「X小姐」從來都唔會托手踭，一一辦妥。老實講，咁耐以嚟，受過「X小姐」恩惠同收過佢禮物嘅人真係唔少，但從來冇人知道佢係邊個，包括大使本人。
另一位大使好佩服嘅「隱形善長」叫「X太」（佢同樣唔願意公開真實姓名），佢嘅愛心唔單止在於金錢上嘅捐獻，重有行動上嘅關懷。話說蘋果基金最近幫緊一位來自內地嘅燙傷女童陳珊籌募醫療費，「X太」睇到之後，就主動打電話嚟，話想私底下探吓珊珊。「X太」真係好有愛心，佢好同情珊珊嘅遭遇，不單止四圍呼籲朋友捐錢，自己亦二話不說捐咗四萬蚊。
更加難得嘅係，「X太」因為唔想剛剛做完手術嘅珊珊舟車勞頓，所以成日揸車接送佢往返醫院覆診。雖然「X太」做咗咁多嘢，但由始至終，佢都冇要求過珊珊或者大使公開鳴謝佢啲乜，佢所做嘅一切都係由心出發。香港𠵱家雖然正處於低潮，但只要人間有愛，大使深信，香港一定有得救！
暖流熱線
電話:29908688
傳真:23702192
電郵:
網址：