本欄在八月二十六、二十七日講公屋租金與入息比例嘅中位數（MedianRent-to-IncomeRatio），一位女讀者陳小姐來電郵講佢自己嘅感受。陳小姐嘅現實個案，在左丁山認知以外，好令人同情，亦值得大家知道。
陳小姐今年二十七歲，與男朋友同居七至八年。十年前中學畢業後投身社會，起薪四千幾，與男朋友租鬧市大廈套房，租金千六，佔兩人月薪二十巴仙。九七年，市道好景，陳小姐月薪加至萬五，轉租鬧市大廈小單位，月租五千六，佔兩人收入嘅比例近20%。近年遭連番裁員減薪，月薪跌落八千五，搬去元朗村屋，月租一千八，租金比例超過21%。
陳小姐就係香港年輕一輩中，唔敢結婚生子，日日死捱，遭經濟不景打擊，由市中心搬去新界嘅打工仔典型，佢哋為生活默默耕耘，不斷調整生活方式去遷就番不斷下降嘅薪酬水平，捱到金睛火眼仍然睇唔到前景。所以陳小姐話：「本人既非中產，亦非綜援戶，從不是公屋戶，看到有關租戶租金官司，就覺得不吐不快……他們有資格可以入住租金廉宜的公屋已經比多數人幸福了，新公屋配套齊全、環境優美，夫復何求，難得他們還勞民傷財地爭拗那細微的百分點，真令我這些無政府資助的小市民更不憤！」陳小姐呢類市民，喺香港不知凡幾，從來冇資格入住公屋，希望佢哋自助者得天助啦。