港股以大成交升破10400至10500的阻力區後，上周五衝破10900大關，創下14個月來新高，而成交152億元，亦係8月13日的161億元以來另一高紀錄，由於陸續有資金入市，後市仍可看好。
基金同大行一路做好友，今次大獲全勝，到目前為止，佢哋看法仍然冇變，預計未來兩三個禮拜仍會係好市，跟住就會出現中期調整，至於恒指會升到哪一個位才掉頭，𠵱家氣勢咁盛，估計仍會升多幾百點。
牛市開始，機構投資者亦加緊物色質優落後股，迎接下一個升浪。基金每睇中一隻股份，無論係透過配股或在市場吸納，只要一爆出入股消息，該股就會脫胎換骨，前有中石油（857）同華豐（364），近有遠東發展（035）。至於一路有基金覬覦，而傳在短期內會有動作的勤達集團（1172），極可能會成為遠展第二。
其實，基金敲過勤達好多次門，但大股東莊士中國（298）好惜貨，每一次都婉拒，有基金急不及待，已在市場吸納。以往莊中揸勤達27.9%，最近行使優先股換股，持股量先上升到47.35%，在唔影響控股權大前提下，家吓批股已有空間，只要基金揸夠貨，股價遲早彈升。
勤達後日（3號）派中期成績表，上年度（02年12月止）盤數好靚，獲利5067萬元，升80.7%，上下半年度獲利分別為1307萬元及3760萬元。03年度上半年有非典影響，盈利或會比去年下半年為少，但相比同期仍會有理想升幅，至於全年盈利估計可保持高增長。
理由係：1擴充廠房完成，增添兩台5色印刷機及8色雙面印刷機，印刷能力提升30%，可應付急增的定單；2繼續調整產品組合，以及減少外發工序，令毛利率保持上升，書本印刷和紙品印刷將提供更大盈利貢獻；3投資物業簽新租約，今年租金收入可倍增至約1200萬元，租約並保證按年加租。
03年度盈利，保守估計有7000萬元，增長38%，每股盈利（全攤薄計）13.1仙，04年度將可升至1億元，每股盈利18.7仙。勤達屬高增長股，又有準基金股概念，以平均仍屬偏低的8倍PE計，明年股價可見1.5元。
郭兆誠