煮飯婆與強伯約法八章：
嗱，老嘢，講明先，今次我哋參加東南亞旅行團，你不得帶任何工作去做。放假重懶要扮做嘢，最掃興，最乞人憎。況且，你根本就冇嘢做，唔好扮忙。
我唔會負責同你洗底褲，度假我乜都唔做。你買定紙底褲又好，全程唔着底褲又好，總之唔好煩我。
不得孤寒。度假時，錢唔係錢，想使就使，有嘢想買就買。分分鐘計住個荷包，有乜好玩？所以，今次你找換咗幾多外幣，全部由我保管。每日，我會畀豐富零用你。至於我點使你嘅錢，你不得過問。
唔該，導遊介紹地方名勝時，你唔好插嘴扮識，因為你唔識。
喺旅遊巴上，如果要唱歌，唔該你唔好搶咪。
夜晚，如果導遊話要帶你哋去啲男人去嘅地方，你有膽，和有零用錢，就去到夠啦！
旅遊途中，唔好一日到黑叫我同你影相，我唔係攝影記者，你亦唔係江華。
唔好人買你又買，買一大堆土產，做咕喱咁抬返去送畀姨媽姑姐，你同佢哋根本冇感情，你不過想騷quali，話畀佢哋知你最近去過東南亞度假。
強伯與煮飯婆與約法三章：
嗱，煮飯婆，你聽住，旅遊途中，如果有其他師奶叫我同佢哋揸機影相，你不得呷醋。如果有師奶叫我同佢哋合照，你不得說話多多。如果有師奶堅持要與我合唱，你就更加不得「發long黎」。
煮飯婆，如果我仍然有吸引力，唔係我嘅錯，係你嘅光榮！