繼昨日我哋為大家介紹過，愛快汽車將會響嚟緊九月舉行嘅法蘭克福車展上，展出新版166車系後，廠方又宣布同場重會展出全新GT車系，以求令車迷響雙門Coupe跑車市場上，能夠有多一個新選擇。
呢款源於同廠156車系嘅全新GT雙門跑車，造型流露有不少拉丁跑車嘅神髓，除車身線條屬流線型設計外，同時又擁有極具懾人魅力嘅車首造型，一派跑車形象可謂表露無遺；加上車身尺碼較大（4480×1760×1390mm），故此車廂空間來得寬敞闊落，容納四名乘客絕不成問題，而前排一雙仿桶形跑車椅，重畀到你舒適嘅乘坐感受㗎！
另外，廠方又為新車安排有多台引擎配搭供用家選擇，當中包括有1.8T.Spark（140匹）及2.0JTS（165匹）等等，當然唔少得重有頂級GTA版嘅一台3.2公升V6偈（240匹）；與此同時，GTA版本嘅懸掛、轉向及制動系統全屬跑車化設計，從而令操控及制動表現更上一層樓，倍添多一份駕駛樂趣呢！新車有望於今年年底推出，有興趣嘅車迷記住密切留意喇！
