花旗股市喺過去兩星期走勢唔錯，尤其係電腦科技股，令到納指逆流而上，本地科技股走勢都唔弱，其中科聯系統（046）更喺上星期五大發神威，升足一成六，一向拍住上嘅兄弟股宏昌科技（061）都唔差，曾經升近2毫9，雖然未有突破，不過線人話千祈唔好睇漏佢，皆因管理層話過今年毋須再作撥備，全年虧損有機會大大縮窄。線人重話，下個月公布嘅中期業績會有改善，話會喺公布業績前做場好戲，目標價係3毫1。
近排成日聽啲官員講港珠澳大橋同西部走廊，似乎真係想將香港發展成為內地嘅出口港，如果真有其事，專做中港物流嘅公司到時實生意唔憂，同時重為炒家提供炒作藉口。
睇番之前兩個星期，有部份同物流相關嘅股份都一一升上嚟，好似國內物流大哥中國外運（598），之前由2.4元升到最高2.875元，雖然近一個星期已經返番2.6元，但喺政府重提西部走廊下，物流業嘅炒作概念，相信又會「死灰復燃」，大家不妨諗諗。
另一隻又有物流概念嘅股仔係意科控股（943），聽講佢哋之前同深業物流及Crown合作嗰檔物流公司，開始攞到生意返嚟。唔知係唔係有「春江鴨」聞到鑊氣，上個禮拜個價已經開始郁郁哋，不過成交重未夠，如果成交多番嘅話，相信就係開車嘅時間，今次目標價話會去到4毫子。
伏勝