容祖兒（Joey）今年唱片大賣，在播映中的電視劇《美麗在望》扮醜女亦獲好評，加上十月開個唱，人氣再升的她明顯博到盡，要在年尾決戰楊千嬅爭奪樂壇天后寶座及女歌手獎，但對於早前發生的樂壇貪污案，Joey竟說：「度度都有呢啲問題㗎啦。」
容祖兒在上半年，憑《我的驕傲》一曲在卡拉OK熱播，在沙士高峯期推出《我的驕傲》一碟，銷量亦不俗，而她於十月又會舉行一連三場的《ShowUp容祖兒演唱會》，同期再出新碟，擺明谷盡跟楊千嬅決戰年尾的天后寶座。
Joey日前在尖沙嘴接受訪問時說：「我唔鍾意同佢（千嬅）鬥，根本鬥唔到，佢有嘅嘢我冇，我有嘅嘢佢冇，𠵱家啲人好勁㗎，可以一次過鍾意好多人，而我又好鍾意長途賽，我呢類型係有排做，做到死為止。」
那麼今年的女歌手獎項，是否Joey心中的目標？她毫不猶豫地說：「會咁諗㗎，我唔會話冇所謂㗎，我今年真係付出好大努力，唔理其他人點講，攞唔攞都有人講㗎啦，你唔想攞又話你怕咗，咁就攞咗先算啦。」
不過，英皇早前捲入樂壇貪污案，會否影響她問鼎女歌手獎項的機會？Joey對此說：「屬於你就係屬於你，唔會受任何問題影響，獎項嘅嘢冇得講，冠軍就得一個㗎啫，自己永遠做到最好嗰三個就夠。」
問Joey是否認同樂壇有黑暗面？她說：「度度都有呢啲問題㗎啦，做好自己嘅嘢就夠，唔需要理發生乜事㗎。」
話雖如此，Joey曾助查樂壇貪污案，加上她出道以來，是非多多，被踩例子多的是，評她肥、彈她醜及指她衣着老套等，故她稱得上是在是非中成長的歌手。她對此說：「新聞嘅嘢日日有，過一日就唔記得㗎啦。新聞就梗係唔好嘅好睇啲，但最緊要知自己做緊乜，好似嗰個『舞影行動』都冇咗下文。
「喺事業上，我已經好順利，批評我唱歌就死畀你睇啦，你話我肥咪減囉，話我着衫唔靚，我𠵱家都有進步呀，嗰時我晚晚喺屋企試衫試幾個鐘，叫媽咪影埋相，盡量將自己整好啲。」
另外，個唱在即，Joey近日正積極籌備，她說：「演唱會入面有一part講少女情懷，我會唱番人哋啲經典歌，好似陳百強嘅《粉紅色的一生》同林志美嘅《初戀》，又會跳舞，有sexy嘅演出，但我係三點不露，唔會着T-back同真空，我會騷在骨子裏。」
前年Joey開個唱時，受聲沙困擾要打開聲針，這次重踏紅館開個唱，她並沒陰影，因她有「三寶」治病，她說：「舊年知道今年要開演唱會時，我好擔心，因為把聲時好時壞，前年開始我去南京做咗一個十日嘅療程，每日拮四支針喺喉嚨，每次做二十分鐘。
「我媽咪又用石斛溝蜜糖，畀我日日當水飲，呢樣係好潤聲嘅。我重每日喺屋企開住蒸氣機，keep住屋企潮濕，等喉嚨唔好乾。有時第日起身，個人會水腫，但把聲緊要啲，咪去跑步同做桑拿出汗囉。」
