電視台有個大鼻主持，成日遲大到，一遲就遲成個鐘，搞到神憎鬼厭，所以啲記者做親有關佢節目嘅採訪都有排等，最慘就係記者唔知情，重以為係電視台安排失當，做嘢唔掂。
呢個大鼻主持，平日鬼咁惡死，所以遲到都冇人夠膽話佢，但佢就成日大大聲鬧人，真係當正自己係電視台老闆，啲幕後工作人員受咗氣，亦敢怒不敢言，最多圍內呻吓。
馮仁昭一直聽過唔少人講話大鼻主持為人有問題，不過要數今次嘅受害人數最多，馮仁昭最睇唔過眼嘅，係大鼻主持成日喺鏡頭前講自己好專業，分明係欺騙觀眾。做得藝人，收得人哋錢，準時開工係最起碼嘅職業道德，重有，要表現自己有地位，唔係靠鬧人鬧返嚟，係要人哋心服口服㗎！
台灣女星賈靜雯噚日喺台北為電視劇《武媚娘傳奇》宣傳，佢話自己最近忙於搬屋，重話為咗呢件事，佢成個月冇化過妝，喺屋企做工人。
雖然好攰，但賈靜雯話因為自己第一次買樓，所以特別重視，無論係裝修、家具同擺設都自己搞，所以辛苦得嚟都好開心。
周華健被邀請擔任台北市政府推廣街頭藝人表演嘅代言人，噚日佢同台北巿巿長馬英九齊齊喺街頭表演，周華健同一大班街頭藝人先做場街頭表演，跟住馬英九頒咗個001號證畀周華健，周華健就名副其實做咗第一個街頭藝人，以後可以光明正大咁喺台灣嘅街頭表演，周華健話覺得好開心亦好興奮。
張信哲前晚喺上海做完演唱會之後，喺慶功宴講起歌迷嘅瘋狂行為，佢話見過最瘋狂嘅fans係東北人，試過有一班東北歌迷瞓咗喺地下，用身體阻擋張信哲嘅車，連命都唔要，不過張信哲話內地嘅歌迷除咗熱情之外，其實亦都好可愛，佢收到最多內地fans送嘅禮物係電話卡。
張衛健同林保怡前晚以東華愛心之星同愛心大使身份出席晚會，重上台唱歌助興。林保怡一早入場同東華總理傾偈，張衛健就遲大到，到影合照時兩人一拍埋，剃光頭嘅張衛健同林保怡，原來不約而同着上米色外套，望落襯到絕，十足十「Twins」咁，不過就係麻甩版。
