我求大俠一直都唔欣賞西甲聯嘅賽程編排，開波時間分散又冇準！好似呢個禮拜開咧，個賽程就幾乎日日改動，開波時間跳嚟跳去，玩死我哋呢啲準備落注嘅波迷外，各大傳媒亦感無所適從！
好似切爾達對梅西亞呢場波咁，上周中第一次出賽程就話係今日打，星期五就公布改為噚日進行；點知噚日又宣布，都係決定今日進行，好似細路仔玩泥沙咁兒戲！另外又收到風話周中巴塞隆拿迎戰西維爾場波，竟然改到當地時間周三凌晨零五分開波（香港時間早上六時零五分），咁都得！
都怪西班牙足總及聯賽會冇鬼用，皆因呢啲賽期如果唔係直播，主要係由對賽球隊自行決定，鍾意點就點，咁就玩死全世界嘞！最慘馬會及我哋傳媒搞錯晒啲賽期，唔知情嘅球迷重以為錯在我哋㖭！
今季西甲電視轉播權，英國嗰邊繼續由「天空體育」頻道奪得。除咗英國球迷可以繼續睇到碧咸嘅風采，亦意味本地波迷即將都可以喺有線ESPN台睇番西甲波。雖然首周賽事大家重未有得睇，希望周中嗰輪已經有直播，盡快做到ESPN廣告中所講：「一切照舊」啦！
前晚有睇三色台播歐洲超霸盃，幾個講波佬照舊錯漏唔少，其中提到「派路冇踢上屆歐冠盃決賽」就錯到離晒譜。我求大俠諗唔知就唔好講，講咗就要負責，咪當球迷重係以前啲儍仔。一唔係就好似嗰個所謂最老資格嘅講波佬咁，噏唔出球員名就一定唔會錯。
皇馬放棄麥馬拿文，俾佢加盟曼城，結束四年大後備生涯。老麥唔吼愛華頓加盟曼城主因，係佢老友科拿𠵱家係曼城人，兩個都好賽馬，大把偈傾。佢話對皇馬都有唔少貢獻，又話自己上屆都踢咗三十場波，但係我求大俠諗佢都唔知踢咗幾多分鐘……老麥真係遊戲人間。
熱刺剛遭英格蘭當局拒絕為美國後衞干維發出工作證，我求大俠就覺得當局做嘢雙重標準。因為車路士簽俄羅斯中場施馬田返嚟即借走；曼聯簽美國門將侯活亦唔夠國際賽上陣次數，但兩人都獲批工作證，反而干維近年幾成美國隊主力都唔批，唔通真係「欺善怕惡」？