張學友、郭富城、庾澄慶和車婉婉等，前晚在九龍灣國際展貿中心參與商台《雲妮夜總會》戶外直播。近日有傳梅艷芳患病，她自言有嚴重貧血，病因是籌備《1:99音樂會》時，她休息不夠所致。
學友的太太羅美薇是阿梅契妹，學友說：「我兩、三個星期前同佢食過飯，佢冇乜嘢，都好食得，完全正常。我會打畀佢了解吓佢嘅病情，一個人有冇病都唔應該拎出嚟討論，咁會令當事人尷尬、難堪同辛苦。」
至於楊千嬅前晚在黃竹坑出席港台活動時，曾當護士的她說：「我唔知阿梅乜嘢事，唔敢亂批評，我會打電話畀佢，我諗佢要休息多啲。」而許志安昨日在山頂出席活動時亦說：「師傅（指梅艷芳）都答咗，要畀私人空間佢。早排我生日，阿梅話約我食飯，但到𠵱家都重未有時間一齊食。」
此外，城城前晚演出時大騷肌肉，他近日正與陳奕迅（Eason）合作新片《重案黐孖Gun》，對於Eason被指情緒不穩一事，城城說：「佢都好正經，唔覺佢有乜嘢，可能工作壓力大。」
採訪：馮美茵 攝影：陳偉權