今正日之明星狗：
容祖兒帶挈今期我至紅

電視連續劇《美麗在望》一出街，全城又再引起一股「狗」熱。戲中飾演DOGDOG的金毛尋回犬又再一次成為萬千寵愛的明星狗，查實除了牠之外，過往都有不少電影、電視、廣告選用狗隻做主角，大家又記得幾多？不如就趁今日同各位重溫呢班另類演員！

祖兒的善心天使
各位觀眾，我就係外表俊朗不凡嘅金毛尋回犬，祖家喺英國蘇格蘭，屬於槍獵犬，性格活躍，個性溫馴，對人類又友善，服從性好強。我重遺傳咗獵犬嘅敏銳嗅覺、警惕性同自信心，一有陌生人行近，就會發出叫聲但唔會作出攻擊，加上一身金黃色毛毛，外表斯文又迷人，所以好多人都鍾意搵我拍戲，演出嘅電影電視劇多到我自己都唔係好清楚，近期代表作係《美麗在望》。
售價：本地約$4,000外國入口約$8,000

法蘭德斯牧牛犬
絕世好狗夠忠心
我個真名叫法蘭德斯牧牛犬，來自比利時，我趕牛好有一手。自從喺《封神榜》一劇亮過相之後，好多人就叫我做「哮天犬」，唔好睇我大大隻，其實我好溫柔又忠心，要馴服我一啲都唔難，只係打理我嘅毛會比較麻煩。
售價：本地約$8,000外國入口約$13,000

西伯利亞雪橇犬
謝霆鋒邊走邊愛雪橇犬
我係出名拉雪橇叻嘅西伯利亞雪橇犬，我來自西伯利亞東部，在雪地係一隻工作犬。外表雖然有啲似狼，其實我天生品性溫和、友善，完全唔惡，就算見到陌生人都毫無戒心，所以好多人都將我當做玩賞犬，唔再係一隻工作犬。
售價：本地約$6,000
　　　外國入口約$10,000

八哥
救命恩人鄭秀文
我係來自中國嘅八哥犬，特徵係身形細小毛短，扁面兼皺皮，個樣的確唔多討好，但因性格穩定、溫和、聰明又好玩，所以我係咁多家庭犬中最受歡迎嘅一種。不過市面有好多都唔係純種，通常價錢都會平一半。
售價：非純種約$3,000　純種約$6,000

斑點狗
IQ爆棚操行零蛋
一睇個樣就知我係斑點狗，其實我重有另外一個名，就係「大麥丁犬」。我屬於大型狗，家鄉喺南斯拉夫、奧地利，咁多狗中我最聰明又頑皮，亦都最難馴服，所以一向都唔係咁受歡迎。
售價：本地約$2,500

老虎狗
被屈有愛滋
講樣我唔及其他狗靚仔，但勝在天生倒及牙，望落都幾可愛。我原產地係英國，本來係打犬，但自1835年英國開始禁止鬥犬之後，我哋嘅性格就開始變得溫馴，但對陌生人會有戒心，所以最叻就係幫手看門口！
售價：本地約$8,000
　　　外國入口約$16,000