Cookies前晚演出港台的「太陽計劃2003閉幕──南區好健康音樂會」，因為成員Theresa感冒，所以隊友遷就她而不唱現場，當她們落力勁歌熱舞時，穿上熱褲的Miki因動作太大而露底。
組合Cookies、容祖兒、楊千嬅、陳奕迅、林嘉欣、陳冠希（Edison）、Twins和Boy'Z等，前晚在香港仔運動場出席港台的「太陽計劃2003閉幕——南區好健康音樂會」。眾歌手穿上大會的Ｔ恤，但為了搶鏡各出奇謀，襯以不同衣飾，其中Cookies成員Miki襯上熱褲在台上載歌載舞時，因為動作太大不慎春光乍洩。
Cookies的另一成員Theresa前晚感冒，所以不能唱現場，Theresa說：「我演出時都差啲暈倒同跣親。」Kary則說：「我哋因為唔可以每個人演唱一部份，所以就留力跳好啲舞。」未知Miki可是這個原因，穿上熱褲仍出盡力的跳而走光。
Twins和Boy'Z前晚則同台演出辣身舞，四人除了有眼神交流外，身體還緊密接觸。問Boy'Z跟Twins跳舞時可有反應，成員Kenny說：「有呀！咁要互相交流，我哋都擔心Twins嘅歌迷會唔鍾意。」至於Edison提到緋聞女友陳文媛日前戴上有Ｅ字的鎖形飾物，似要鎖住Edison的心，他對此否認說：「唔關我事，唔通佢戴ＬＶ，又話掛住Ｌ同Ｖ咩。最近有雜誌去咗我公司影商業登記，嗰度又係我朋友屋企，咁樣侵犯我朋友啲私隱。」
此外，林嘉欣對於近日纖體公司再利用她的相片宣傳，她前晚說：「嗰輯係舊相，纖體公司好清楚我嘅體格，佢哋唔係要sell我骨感，係健康嘅瘦。我近排幫麥當勞拍廣告，我都有通知纖體公司。」而鄭中基和楊千嬅前晚同台演出，二人不但沒有避忌，還有傾有講。
採訪：王連連、李珮洳
攝影：陳志嵐、甄朝健
