最近開始喺香港流行嘅快閃黨呢兩日又再出動，噚日一班快閃黨去咗又一城百佳拍西瓜；網上又流傳，話快閃黨今日約好正午行動，圍住尖沙嘴鐘樓，當十二點鐘聲響起時大叫「董建華下台」，再拍三下掌即時解散。
呢個快閃行動絕對唔係八方自己作出嚟，早於八月十六日嘅政府《基本法》網頁討論區已經出現，有一個快閃黨網頁都話今日喺尖沙嘴區有活動。今日嘅「倒董快閃」反應唔知熱唔熱烈，不過噚日嘅快閃行動就似乎唔係好成功。
一班快閃黨原本約好噚日踏正三點去到又一城百佳，到咗三點左右，有二十幾人到場，但最後真係有拍西瓜嘅，就唔夠十個人。
呢班快閃黨大部份都係十零二十歲，佢哋去到百佳之後，就走去放西瓜嘅位置附近徘徊。但係到咗三點正，個個都重企晒喺度，冇人走去拍西瓜，唔知係唔係俾大班記者嘅「快閃燈」嚇親，定係知道咗附近有成十個便衣警察呢？
終於，一對年輕男女鼓起勇氣，走埋去西瓜度拍咗一下，然後就即閃。跟住就有五、六個後生仔，攞起西瓜把玩一陣，大叫一聲、大拍西瓜之後亦走咗，警察當然冇行動啦。
第一個走去拍西瓜嘅十九歲少女Shirley話今次幾過癮，不過有啲失望，因為得咁少人一齊拍西瓜，覺得香港人唔係好團結。唉！我諗我八方老啦，實在唔明年輕人點諗！
傳真︰2623-9278
電郵︰