有望於今年10月正式推出嘅新版愛快166，可謂經廠方精心改良後，才與全球車迷見面；當中最惹人注目嘅會係全新車首設計，不但鬼面罩嘅面積較前來得更大，襯以兩旁生風導入口，同埋一對炯炯有神嘅頭燈組合，造型望落倍見有一份吸引力，而扁長嘅尾燈，亦帶有同廠156車系嘅神髓呢！車廂配搭方面，除空間較前來得更見寬敞闊落，附以承托力極高嘅座椅，令乘坐舒適度十足外，設備配搭亦略有改動，以求達到方便易用嘅好處；經過重新編排嘅表板，亦能予人耳目一新之感呢！
另外，廠方亦為新版166安排有多台引擎供用家選擇，當中電油引擎包括有2.0TS（150匹）、2.5V6（188匹）、3.0V6（220匹）及3.2V6（240匹）型號，匹配6前速手波或全新5前速自動波，性能表現可謂毋庸置疑。