肥仔K到S牌咖啡室買杯咖啡，用咗二十幾蚊，牙痛咁聲，猛話咖啡店謀取暴利。餐廳羅聽見，就教訓肥仔K：「世姪，你幫襯我間酒吧飲杯可樂，收你二十蚊，是否謀取暴利？」肥仔K答：「當然係啦，罐裝可樂好平㗎咋。」餐廳羅話：「啱嘞，你老竇有酒吧股份嘅，你返去問佢係唔係好好賺？」
肥仔K返到屋企，自然猛咁問老竇。K爸歎一句：「賣一杯飲品，二十元賺咗十九元，又有乜用。用成本為基數計，毛利係十九倍，嚇死人，用售價計，毛利係九十五巴仙，亦好犀利。一般餐廳嘅餐飲價，毛利率大概係七十巴仙。但記住，一百蚊銷售賺毛利七十蚊之後，要交租、要出糧畀夥計、要交電費水費排污費煤氣費清潔費牌照費，可能重有公關費宣傳費，最後如果賺到十蚊，就交稅個六，得番八個四，你話好唔好賺吖？」肥仔K乃醒目之人，知道稅後純利率係八點四巴仙，叫做有得賺，唔算高噃。
肥仔K睇報紙知道李嘉誠話百佳做一百蚊生意，大概賺到兩蚊，心諗乜咁低微呀？上網查吓佢喺美國幫襯慣嘅Wal-Mart，俾佢查到二○○二年Wal-Mart嘅稅後盈利率係三點三巴仙，再查吓法國大亞哥家樂福Carefour，純利率係兩個巴仙，超級市場生意又真係唔係咁好賺喎，只不過薄利多銷啫。佢向老竇報告結果，K爸話：「你唔好再向餐廳羅呻佢謀取暴利嘞。」